टिप्परची अँपेला धडक; एक ठार, एक गंभीर

मेहकरकडून चिखलीकडे भरधाव वेगाने येत असलेल्या टिप्परने अँपेला धडक दिल्याने एक ठार तर एक गंभीर.

चिखली : मेहकरकडून चिखलीकडे भरधाव वेगाने येत असलेल्या रेतीची वाहतूक करणार्‍या टिप्परने केळवदवरुन सवडद येथे जात असलेल्या अँपेला जबरदस्त धडक दिल्याने एक ठार तर एक जण गंभीर जखमी झाल्याची घटना कोलारा फाट्यानजीक २६ मेच्या रात्री १0.३0 वाजेच्या दरम्यान घडली. साखरखेर्डा पोलिस स्टेशन अंतर्गत येणार्‍या सवडद येथे केळवदवरुन पैशाचा व्यवहार करण्यासाठी जात असताना कोलारा फाट्यानजीक समोरुन भरधाव वेगाने वाळू वाहतूक करणारे टिप्पर क्रमांक एम.एच.३४ ला जबर धडक दिल्याने झालेल्या अपघातात अशोक धोंडू खराट (४0) रा.केळवद व गजानन विलास देशमुख (५0) सवडद हे दोघे गंभीर जखमी झाले असून, अँपेचा चालक प्रताप सुरेश पाटील हा किरकोळ जखमी झाला आहे. अपघाताची माहिती कळताच चिखली पोलिस स्टेशनचे कर्मचारी व मनसेचे शेतकरी सेलचे प्रदीप भवर, प्रवीण महाडीक, रवि पेटकर, काँग्रेसचे विष्णू सोळंकी यांनी अपघात स्थळावर धाव घेऊन जखमीला ताबडतोब ग्रामीण रुग्णालयात हलविले. ग्रामीण रुग्णालमध्ये जखमींवर प्रथमोपचार करुन पुढील उपचारार्थ त्यांना औरंगाबाद येथे हलविण्यात आले. उपचारादरम्यान अशोक धोंडू खराटे (४0) रा.केळवद या इसमाचा मृत्यू झाला. याप्रकरणी प्रताप सुरेश थोरात रा.केळवद वय २९ यांनी चिखली पोलिस स्टेशनला दिलेल्या तक्रारीवरुन आरोपी ट्रकचालकावर कलम २७९, ३३७, ३३८, ३0४ अ नुसार गुन्हा दाखल केला असून, तर औरंगाबाद येथे भरती असलेले गजानन विलास देशमुख यांची प्रकृती चिंताजनक आहे.