उसाला आग लागून तीन लाखांचे नुकसान

मेहकर तालुक्यातील सुकळी येथील घटना; साडेतीन एकरावरील पिकांचे नुकसान.

मेहकर (जि. बुलडाणा): तालुक्यातील सुकळी येथील शेतकरी कडूजी त्र्यंबक नवले यांच्या सोनाटी रोड स्थित गट नंबर १३९ मधील आठ एकरच्या ऊसाच्या शेतात सकाळच्या वेळेस अचानक आग लागल्यामुळे साडेतीन एकरमधील ऊस जळून खाक झाल्याची घटना २0 नोव्हेंबर रोजी सकाळी ८ वाजताच्या सुमारास घडली. सुकळी येथील गट नंबर १३९ मधील कडूजी त्र्यंबक नवले यांच्या ऊसाच्या शेतात सकाळी अचानक आग लागली. आग लागल्याची माहिती मिळताच उकळी सुकळी येथील शेतकर्‍यांनी काही युवकांच्या मदतीने ही आग विझविण्याचा प्रयत्न केला; परंतु उसाच्या शेतातील सुकलेल्या पाल्यापाचोळ्यामुळे आगीने रौद्ररूप धारण केले. काही युवकांनी शेतातील मोटरपंपद्वारे पाणी टाकून आग विझविण्यास सुरुवात केली. यावेळी तलाठी सानप यांना माहिती मिळताच त्यांनी तहसीलदार निर्भय जैन यांना कळविले. गावातील सर्वच लोकांनी ही आग आटोक्यात आणण्यासाठी प्रयत्न केले. यावेळी तहसीलदार निर्भय जैन यांनी संपूर्ण शेतात ट्रॅक्टर चालवून आग विझविण्याचा उपाय सुचविला, गावातील ४ ते ५ ट्रॅक्टर उभ्या उसाच्या शेतात घुसवून फिरवले व आग आटोक्यात आणण्यात गावकर्‍यांना यश आले. यावेळी मेहकर नगर पालिकेचे अग्निशामक दलही घटनास्थळावर पोहोचले होते; परंतु त्यापूर्वीच तहसीलदार निर्भय जैन यांच्या समयसुचकतेमुळे पुढील अनर्थ टळला. आग आटोक्यात येताच गावातील युवकांनी संपूर्ण आग लागलेल्या शेतात पाणी टाकून आग विझल्याची खात्री केली. या घटनेत शेतकरी कडूजी नवले यांच्या साडेतीन एकर शेतातील ऊस पूर्णपणे जळून खाक झाला. ड्रीपिंगचे साहित्य असे एकूण तीन लाख सत्तर हजार रुपयांचे नुकसान झाले.