गोठय़ाला आग लागून तीन जनावरांचा मृत्यू

ढालसावंगी येथील दोन शेतक-यांच्या गोठय़ाला आग.

धाड (जि. बुलडाणा) : नजीकच्या ढालसावंगी येथील दोन शेतकर्‍यांच्या गोठय़ाला आग लागून तीन जनावरांचा आगीत जळून मृत्यू झाल्याची घटना २८ जून रोजी मध्यरात्री घडली. यात जनावरांचा चारा व इतर शेतीचे साहित्य जळून शेतकर्‍याचे दोन लाखाचे नुकसान झाले. ढालसावंगी येथील शेख इकराम शेख रहेमान व शेख शब्बीर शे.इकराम यांच्या शेतात जनावरांचा गोठा आहे. २८ च्या रात्रीदरम्यान गोठय़ाला आग लागली. ही घटना ग्रामस्थांच्या लक्षात आल्यावर आग विझवण्यासाठी सर्वांनी प्रयत्न केले; मात्र आगीचे स्वरूप भीषण असल्याने यात शेख इकराम शेख रहेमान यांच्या मालकीचे दोन बैल व शेतीसाहित्य तसेच शेख शब्बीर शेख इकराम यांच्या मालकीची एक गाय व साहित्य जळून खाक झाले. याबाबत तहसीलदार दीपक बाजड यांनी २९ जून रोजी भेट देऊन पंचनामा केला.