चोरट्यांनी एक लाखाचे दागिने पळविले

महिलेच्या गळ्यातील १ लाख ५ हजार रुपये किमतीचे सोन्याचे दागिने अज्ञात चोरट्यांनी पळविले.

बुलडाणा : सकाळी मॉर्निंग वॉकसाठी गेलेल्या महिलेच्या गळ्यातील १ लाख ५ हजार रुपये किमतीचे सोन्याचे दागिने अज्ञात चोरट्यांनी पळविले. ही घटना ९ जुलैच्या सक ाळी ७ वाजेच्या दरम्यान घडली. याप्रकरणी पोलिसांनी अज्ञात चोरट्यांविरुद्ध गुन्हा दाखल केला. शिवशंकर नगरमधील रहिवासी कुसुमबाई रामराव सिरसाट या ९ जुलै रोजी नेहमीप्रमाणे सकाळी मॉर्निंग वॉकसाठी चिखली रोडने जात होत्या. विजय गॅरेजजवळ समोरून दोघे जण मोटारसायकलवरून आले व त्यांनी गळ्यातील ४५ हजार रुपयांचा सोन्याचा गोफ, ६0 हजार रुपये किमतीची गहू पोत, असा एकूण १ लाख ५ हजार रुपयांचा ऐवज लंपास केला व फरार झाले. या प्रकरणी पोलिसांनी अज्ञात चोरट्यांविरुद्ध गुन्हा दाखल केला. घटनेची माहिती कळताच माजी सरपंच अरुण सिरसाट यांनी लगेच पोलिस स्टेशनला फोन केला; मात्र चार वेळा फोन करूनही पोलिस स्टेशनमधून फोन उचलला नाही. त्यानंतर पोलिस स्टेशनला जाऊन तक्रार करावी लागली. वेळीच पोलिसांनी दखल घेतली असती, तर चोरट्यांना पकडणे कठीण नव्हते. या घटनेमुळे सकाळी फिरण्यासाठी जाणार्‍या ज्येष्ठ नागरिकांमध्ये दहशत पसरली आहे.