फिर्यादी किशोर अंबादास खरात (२४, रा.नांदखेडा) हे जाफराबादवरून दुचाकीने घरी जात असताना अनोळखी पाच जणांनी त्यांची दुचाकी जाफराबाद रोडवरील प्रवासी निवाऱ्याजवळ अडवून हत्याराने जखमी केले. त्यांच्या खिशातील मोबाइल व नगदी आठ हजार रुपये असा एकूण अकरा हजार रुपयांचा ऐवज सायंकाळी पळवून नेला. याबाबत पोलिसांनी १९ सप्टेंबर रोजी विविध कलमान्वये गुन्ह्याची नोंद केली असून अधिक तपास देऊळगाव राजा पोलीस करीत आहेत.
८० हजारांची घरफोडी
तालुक्यातील ग्राम गारगुंडी येथील रंगनाथ भाऊराव काकड यांच्या राहत्या घरी अज्ञात चोरट्यांनी घराच्या पाठीमागील दरवाजाचा कडी कोयंडा तोडून घरामध्ये प्रवेश केला. घरातील लोखंडी कपाट व लोखंडी संदूक यामधील एकदाणी (किं. २५ हजार),गहू मन्याची पोत (किं. ३० हजार) तसेच लहान मुलांच्या कानातील बाळी (किं. ७ हजार) आणि रोख रक्कम १५ हजार रुपये असा एकूण ८० हजार २०० रुपये किमतीचा मुद्देमाल लंपास केला. याप्रकरणी फिर्यादी रंगनाथ भाऊराव काकड यांच्या फिर्यादीवरून देऊळगाव राजा पोलिसांनी १९ सप्टेंबरला विविध कलमान्वये गुन्हा दाखल केला आहे.
आरोपींच्या शोधार्थ अतिरिक्त पथक गठीत
देऊळगाव राजा पोलीस स्टेशन अंतर्गत घडलेल्या दोन्ही घटना या १८ सप्टेंबर रोजी एकाच दिवशी घडल्या आहेत. याप्रकरणी पोलिसांनी अतिरिक्त पथकांची नेमणूक करून आरोपीच्या शोधामध्ये पाठवले असल्याची माहिती पोलीस निरीक्षक जयवंत सातव यांनी दिली आहे.