२00 रूपयांची लाच घेताना तलाठी अटकेत

वैरागड येथे लाचलुचपत विभागाची कारवाई.

चिखली (जि. बुलडाणा): सातबार्‍यावर पीककर्जाचा बोजा चढविण्यासाठी शेतकर्‍याकडून २00 रुपयांची लाच स्वीकारताना तालुक्यातील वैरागड येथे कार्यरत तलाठी शिवानंद वाघ यांना लाचलुचपत विभागाच्या पथकाने सापळा रचून रंगेहात पकडले. ही कारवाई २९ मे रोजी दुपारी १२ वाजेच्या सुमारास करण्यात आली. तालुक्यातील हारणी येथील अरूण पवार यांचे वडिलांच्या नावावरील गट क्रमांक ५/१ मधील शेतावर वाढीव पीककर्ज मंजूर झाल्याने बँकेने पूर्वीचे पीक कर्जाचा बोजा सातबारावर चढवून आणण्यास सांगितले. त्यानुसार वैरागड-हारणी वर्ग ३ चे तलाठी शिवानंद नंदराम वाघ वय ४0 यांच्याकडे शेतकरी गेला असता तलाठी वाघ यांनी पाचशे रूपये लाचेची मागणी करून तडजोडीअंती दोनशे रुपये घेऊन येण्यास सांगितले. याबाबत शेतकरी पवार यांनी लाचलुचपत विभागाकडे तक्रार दाखल केल्यानंतर २९ मे सापळा रचण्यात आला होता. दरम्यान, दुपारी पावणे बाराच्या सुमारास वैरागड येथील तलाठी कार्यालयात तलाठी शिवानंद वाघ हे शेतकरी अरूण पवार यांच्याकडून २00 रुपये स्वीकारताना बुलडाणा लाचलुचपत प्रतिबंधक विभागाने लावलेल्या सापळय़ात अडकले. याप्रकरणी कलम ७, १३ (१) (ड) सह १३ (२) लालुप्रकानुसार तलाठी शिवानंद वाघ विरुद्ध अमडापूर पोलीस स्टेशनमध्ये गुन्हा नोंदविण्यात आला आहे. ही कारवाई पोलीस अधीक्षक महेश चिमटे, अपर पोलीस अधीक्षक आर.एस.तडवी यांच्या मार्गदर्शनात पोलीस उपअधीक्षक एस.एल.मुंढे, पोनि. नाईक, पोहेकाँ सुभाष शेकोकार, नेवरे, पोना शेवाळे, जवंजाळ, ठाकरे, नीलेश सोळंके, राजनकर, वारूळे यांचा सहभाग होता. मागील वर्षभरात लाच स्वीकारताना अटक करण्यात आलेल्यांची संख्या मागील वर्षाच्या तुलनेत वाढली आहे. लोकांमध्ये जागृती होत असल्याने अशा प्रकरणाचा पडदाफाश होत आहे.