अपात्रता प्रकरणामध्ये अपर आयुक्तांकडून स्थगिती

दिवठाणा येथील उपसरपंचासह एका सदस्याचा अपात्रता प्रकरणातील निर्णयावर अपर विभागीय आयुक्ताने स्थगन आदेश दिला.

चिखली(जि. बुलडाणा), दि. १९: दिवठाणा येथे ग्रा.पं.सदस्यांना कुठलीही संधी न देता अपात्र करण्यात आल्यामुळे सदर निर्णयावर स्थगनादेश मिळावा, हा युक्तीवाद ग्राह्य धरत अपर विभागीय आयुक्त अमरावती यांनी उपसरपंच व सदस्यांच्या अपात्रतेला स्थगनादेश दिला. दिवठाणा येथील ग्रा.पं. सदस्यांना विहीत कालावधीत जातवैधता प्रमाणपत्र सादर करणे बंधनकारक आहे; परंतु ग्रा.पं.सदस्यांनी सदर जात प्रमाणपत्र सादर न केल्याने २५ जुलै २0१६ पर्यंंतचा अल्टीमेटम संपल्यानंतर जिल्हाधिकारी डॉ.विजय झाडे यांनी ७ सप्टेंबर रोजी जिल्ह्यातील २२८ ग्रा.पं.सदस्यांना अपात्र ठरविले होते. जिल्हाधिकार्‍यांच्या निर्णयाला आव्हान देत दिवठाणा येथील उपसरपंच विलास सोनाजी वसु व ग्रा.पं.सदस्य निता किशोर मोरे यांनी व जिल्हा न्यायालयातील अँड.डी.के.राऊत यांच्या मार्फत अमरावती आयुक्त कार्यालयात दाद मागितली. १५ सप्टेंबर रोजी प्रकरणावर युक्तिवाद होऊन त्यांच्या अपात्र करण्याच्या निर्णयाला स्थगिती दिली.