उपसरपंचाला लाच घेताना पकडले

लोणार तालुक्यातील घटना; विहिरीचा मंजूर आदेश देण्यासाठी मागितली होती लाच.

लोणार : रोहयो योजनेतून मंजूर झालेल्या विहिरीचा कार्यारंभ आदेश देण्यासाठी शेतकर्‍याकडून दोन हजार रुपयांची लाच घेणारा आरडव येथील उपसरपंच कचरू महादू सानपसह ग्रामपंचायत सदस्याचा पती लाचलुचपत प्रतिबंधक विभागाच्या जाळ्यात अडकला आहे. रोहयोमधील विहिरींच्या बांधकामासाठी तीन लाख रुपयांचे अनुदान मंजूर झालेल्या आरडव येथील स्वप्निल बबन मोरे या तरुण शेतकर्‍याकडून तीन महिन्यांपूर्वी आरडवचे उपसरपंच कचरू महादू सानप तसेच ग्रामपंचायत सदस्याचे पती सुदाम दगडू मोरे यांनी २0 हजार रुपये घेतल्यानंतरही शेतकर्‍यास विहिरीचा कार्यारंभ आदेश देण्यास टाळाटाळ केली. उपसरपंचाने स्वप्निल बबन मोरे या शेतकर्‍यास पुन्हा दोन हजारांची मागणी केली. पैशाच्या या मागणीमुळे त्रस्त झालेल्या स्वप्निलने लाचलुचपत प्रतिबंधक विभागाकडे तक्रार केली. यावरून लाचलुचपत प्रतिबंधक विभागाचे उपविभागीय पोलीस अधिकारी विलास पाटील यांनी सापळा रचून बुधवारी दुपारी ४ च्या सुमारास तहसील कार्यालयावर स्वप्निल मोरे यांच्याकडून कार्यारंभ आदेशासाठी दोन हजारांची लाच घेणारा आरडव येथील उपसरपंच कचरू सानप आणि सुदाम मोरे यांना रंगेहात पकडले. लाचलुचपत प्रतिबंधक विभागाचे विलास पाटील, सतीश ढोकणे, विजय वाकडे, संजय शेळके, प्रदीप गडाख, श्याम भांगे आणि सुखदेव ढाकरे हे कारवाईत सहभागी होते.