नीलेश शहाकार / बुलडाणा : शहरात विविध सामाजिक, धार्मिक व शैक्षणिक उत्सव तसेच सामाजिक कार्यकर्ते, राजकीय व्यक्ती यांचा वाढदिवस आदी विविध उपक्रमांतून रक्तदान चळवळीला बळ मिळाले आहे. गत वर्षभरात अशाप्रकारे १३५ रक्तदान शिबिरांचे आयोजन करण्यात आले. त्याद्वारे अनेक गोरगरीब रुग्ण आणि रक्ताची गरज भासणार्‍यांपर्यत वेळीच रक्त पोहचविण्याची मोलाची भूमिका पार पाडण्यात येत आहे. जिल्ह्यातील धार्मिक सण, उत्सव जयंती तसेच राजकीय नेत्यांचे जन्मदिन आदी प्रक्रियांमधून दिवसेंदिवस जिल्ह्यातील रक्तदान चळवळीला वेग मिळत आहे. त्यातच शहरातील विविध ब्लड बँक यामध्ये महत्त्वपूर्व भूमिका बजावत आहेत. ह्यरक्तदान हे श्रेष्ठ दानह्ण असे म्हटले जाते. दरवर्षी जिल्ह्यातील शेकडो गरजवतांना विविध कारणामुळे रक्तांची आवश्यकता पडते. ब्लड बँकांमधून त्यांची गरज पूर्ण होते खरी, मात्र बरेचदा गरजूंची अडवणूक केली जाते. काही ठिकाणी जास्त पैशांची मागणी करून गरजूंचे मानसिक खच्चीकरणही होते. यात सर्वांंत जास्त अडचण ग्रामीण जनतेची होते. ही गरज लक्षात घेता, ब्लड बँकामध्ये रक्तसाठा अपुरा पडू नये, या उद्देशाने विविध सामाजिक संघटना, उत्सव मंडळ आणि राजकीय मंडळांचे सदस्य आपआपल्या परीने राबताना दिसतात. जिल्ह्यात शिवजयंती, महात्मा फुले जयंती, डॉ. आंबेडकर जयंती, महावीर जयंती, अग्रसेन जयंती, गणेशोत्सव, नवरात्र, नेत्यांची वाढदिवस व विविध उत्सवांदरम्यान सामाजिक उपक्रमांमधून रक्तदान शिबिरांचे आयोजन करण्याचे प्रमाण वाढत चालले असून, रक्तदान चळवळीला सामाजिक अधिष्ठान प्राप्त झाले आहे.
वर्षभरात जिल्ह्यात झालेले रक्तदान शिबिर
सामाजिक संघटना ४५
राजकीय क्षेत्र ३0
शैक्षणिक क्षेत्र २५
सणउत्सव, जयंती १५
ग्रामीण क्षेत्र १0