वर्षभरापासून शिवसेना तालुकाप्रमुख पद रिक्तच

गेल्या एक वर्षापासून तालुकाप्रमुख पद रिक्त असल्याने अनेक इच्छुकांनी खा. प्रतापराव जाधव यांच्याकडे गेल्या वर्षभरात सेटिंग करून बघितली. परंतु अद्यापही खा. जाधवांनी आपला कौल उघड केला नाही. मेहकर मतदारसंघात सध्या शिवसेना गल्लीपासून मंत्रालयापर्यंत सत्तेत असल्याने या पदाला लोणार तालुक्यात अनन्यसाधारण महत्व आहे. त्यामुळे इच्छुकांची संख्या मोठी असून हिच खरी डोकेदुखी शीर्ष नेतृत्वाला असल्याने नवीन निवडीला विलंब होत असल्याची माहिती आहे. एका नावावर शिक्कामोर्तब करून उरलेल्या इच्छुकांची नाराजी नको या भावनेतून सध्या खा. जाधव व आ. रायमूलकर यांनी हा विषय अजून हाताळलेला नाही. परंतु या विलंबामुळे सर्वसामान्य शिवसैनिक व इच्छुक मात्र कमालीचे अस्वस्थ दिसून येत आहे. गेले २७ वर्ष प्रा. मापारी यांनी तालुक्यातील शिवसेनेचे नेतृत्व सक्षमपणे केले. त्याचे फलित म्हणून पक्षाने व खा. प्रतापराव जाधव यांनी अनेक सत्तेची पदे त्यांना दिली. त्यांनी सुध्दा या पदाचा वापर तालुक्यातील शिवसेनेचे संघटन मजबूत करण्यासाठी केला. त्यामुळेच त्यांची आता जिल्हाप्रमुख पदावर नियुक्ती केली गेली आहे. परंतु त्यांना पर्याय म्हणून बरेच दिग्गज शिवसैनिक तालुक्यात असून सुध्दा गेल्या वर्षभरात एकाही नावावर वरिष्ठ पदाधिकाऱ्यांकडून शिक्कामोर्तब होत नसल्याने तालुक्यातील राजकीय क्षेत्रात आश्चर्य व्यक्त होत आहे. त्यामुळेच तालुक्याला केव्हा नवीन तालुकाप्रमुख मिळेल, याकडे सर्वसामान्य शिवसैनिकांचे लक्ष लागलेले आहे.