एचआयव्हीमुक्त भारतासाठी मोटारसायकलव्दारे प्रचार

औरंगाबादच्या युवकाने २0 मे पासून संपूर्ण महाराष्ट्रात मोटारसायकलव्दारे प्रचार अभियान सुरू केले आहे.

बुलडाणा : एचआयव्ही बाबत समाजात असलेल्या भ्रामक कल्पना व गैरसमज यामुळे या आजाराचे थैमान दिवसेंदिवस वाढतेच आहे. सर्वसामान्यांना याबाबत माहिती व्हावी व गैरसमज दूर व्हावेत, म्हणून औरंगाबादच्या आदेश आटोटे या युवकाने २0 मे पासून संपूर्ण महाराष्ट्रात मोटारसायकलव्दारे प्रचार अभियान सुरू केले आहे. हा युवक आज बुलडाण्यात आला असता त्याने आपल्या अभियानाची माहिती ह्यलोकमतह्णला दिली. संगीत शिक्षक असलेल्या आदेश आटोटे औरंगाबाद, पुणे येथील बालगृहात काम करीत असतांना एचआयव्हीबाबत जनजागृतीचे व्रत त्याने हाती घेतले. ६ वर्षाच्या कालावधीत तब्बल १२३ जणांचा एचआयव्हीने झालेला मृत्यू त्याने अनुभवला. या मृत्यूंमध्ये रूग्णांच्या बाबतीत असलेले गैरसमज हे सर्वात मोठे दुखणे असल्याची बाब त्याच्या लक्षात आल्याने त्याने गावागावात प्रचार अभियान राबविण्याचा निर्णय घेतला. औरंगाबादमध्ये लोकसहभागातून आदेशला मोटारसायकल घेवून देण्यात आली. यावेळी कचरा उचलणार्‍या महिलांनीही कष्टाची रक्कम आदेशच्या हाती सोपवली. आदेश २0 मे पासून जालना, दे.राजा, चिखली अशा शहरांना व यामधील विविध गावांना भेटी देत आज बुलडाण्यात पोहोचला. उद्या नांदुरा, खामगांव मार्गे तो अकोल्यात दाखल होणार आहे. मुळचा मुर्तिजापूर येथील समशेरपूर येथील रहिवासी असलेला आदेश संपूर्ण महाराष्ट्र फिरून जागतिक एचआयव्ही दिन १ डिसेंबर रोजी औरंगाबादमध्ये परतणार आहे व तेथे या अभियानाचा समारोप होईल, असे तो म्हणाला.