बुलडाणा : काेराेना संसर्ग वाढत असल्याने जिल्हा प्रशासनाने आठवडी बाजारांवर बंदी लादली आहे. त्यामुळे भाजीपाला उत्पादक शेतकरी संकटात सापडले आहेत. रविवारी बुलडाणा शहरात कांद्यासह भाजीपाल्याचे भाव काेसळले.
गत आठवड्यापासून कांद्याची आवक वाढली आहे. त्यामुळे १४ मार्च राेजी कांदा २० ते ३० रुपये किलाे विकला गेला. कांद्याचे भाव १० रुपयांनी कमी झाले. बाजारात नव्याने दाखल झालेल्या ढेमशांचे भाव ५० रुपयांवर गेले आहेत. तसेच इतर भाज्यांचे दर कायम आहेत. हिरवी मिरची ४० रुपये किलाे, वांगी ३० रुपये किलोवर पाेहोचली आहेत. आवक घटल्याने मेथी, पालकचे दरही वाढले आहेत. फळ बाजारात सफरचंद, माेसंबी, संत्रे आदींची आवक माेठ्या प्रमाणात कमी झाल्याने दर जवळपास दुप्पट झाले आहेत. किराणा साहित्यामध्ये तेलाचे दर गेल्या आठवड्यापेक्षा वाढले आहेत.
टरबूज, खरबुजांची आवक वाढली
पाण्याची साेय असलेल्या अनेक शेतकऱ्यांनी या वर्षी टरबूज, खरबुजाची माेठ्या प्रमाणात लागवड केली आहे. साधारणत: जानेवारी महिन्यात टरबुजाची लागवड करण्यात येते. मात्र, अनेक शेतकऱ्यांनी त्यापूर्वीच लागवड केल्याने बुलडाणा शहरातील विविध भागांत टरबुजाची आवक वाढली आहे. टरबूज २० रुपये तर खरबूज ३० रुपये किलाेप्रमाणे विकले जात आहेत. द्राक्षेही बाजारात दाखल झाली असून ६० ते ८० रुपये किलाेप्रमाणे विकली जात आहेत.
शेतकऱ्यांची थेट विक्री
कृषी विभागाने सुरू केलेल्या याेजनेंतर्गत जिल्ह्यातील अनेक शेतकऱ्यांनी टरबूज, खरबुजाची थेट विक्री सुरू केली आहे. बुलडाणा शहरातील चिखली राेडवर अनेक शेतकऱ्यांनी टरबुजाची दुकाने लावली आहेत. तसेच इतर भागातही ट्रॅक्टरने माल घेऊन शेतकरी विक्री करीत आहेत. त्यामुळे शेतकऱ्यांना थेट लाभ मिळत असल्याचे चित्र आहे.
कांद्याची आवक वाढल्याने भाव कमी झाले आहेत. नव्याने बाजारात आलेल्या भाज्यांचे भाव वाढलेले आहेत. इतर भाज्यांचे दर कायम आहेत.
- गणेश सुरवाडे, भाजी विक्रेता
द्राक्षांची आवक वाढल्याने भाव कमी झाले आहेत. चांगल्या दर्जाची द्राक्षे ८० रुपये किलाेप्रमाणे विकली जात आहेत. तसेच टरबूज, खरबूजही बाजारात दाखल झाले आहेत. टरबूज २० रुपये तर खरबूज ३० रुपयांप्रमाणे विकले जात आहेत.
- सलीम बागवान, फळ विक्रेता