खामगाव: राज्य परिवहन महामंडळाच्या आगारांमधील जागा व्यावसायिकांना भाडेतत्त्वावर देण्यात आल्या आहेत; मात्र सदर व्यावसायिकांकडून परवानगीपेक्षा जादा जागेचा वापर होत असल्याचे तपासणीत आढळून आल्याच्या कारणावरून ३0 लाख ७६ हजार रुपयांचा दंड भरण्याच्या नोटीस परिवहन महामंडळाच्या कार्यालयाने दिल्या आहेत. यामध्ये खामगाव येथील वाहनतळासह जिल्हय़ातील एकूण ११ व्यावसायिक प्रतिष्ठानांचा समावेश आहे. बसस्थानकावर विविध सुविधा पुरविता याव्या यासाठी बसस्थानक आवारातील जागा भाडेतत्त्वावर देण्यात आल्या आहेत; मात्र या वाणिज्य आस्थापनाच्या तपासणीत बुलडाणा विभागातील चार आगारांमधील ११ परवानाधारक व्यावसायिकांकडून परिवहन मंडळाची अतिरिक्त जागा वापरल्याचे दिसून आले. त्यामुळे अशा ११ व्यावसायिकांना सुमारे ३0 लाख ७६ हजार रुपये दंडाच्या नोटीस परिवहन महामंडळाकडून देण्यात आल्या आहेत. यामध्ये खामगाव बसस्थानकावरील चौकसे दुचाकी वाहनतळाला ४ लाख ५२ हजार ८७0 रुपये, मलकापूर येथील काझीनाझी मुद्दिन जनरल प्रोव्हिजन ८३ हजार ७१२ रुपये, म. नासीम म. सैय्यद फ्रूट स्टॉल ८९ हजार ८५६ रुपये, अमानउल्ला हबीबउल्ला आइस्क्रीम स्टॉल २२ हजार ९९२ रुपये, मेहकर येथील अनिल देशमुख इलेक्ट्रॉनिक्स व मोबाइल शॉपी ८ हजार २0५ रुपये, समाधान कुसुंबे कोल्ड्रिंक्स ३८ हजार ९८५ रुपये, तुकाराम कामटे रसवंती १३ हजार ८३४ रुपये, सुरेश आंबेकर जनरल प्रोव्हिजन ६ हजार ५३६ रुपये, सिंदखेडराजा येथील स्नॅकबार १८ हजार ३६0 रुपये, धाड येथील उमेश जाधव उपाहारगृह यांना ५ लाख ५९ हजार १५ रुपये, जी.आर. उपाहारगृह १७ लाख ९८ हजार ३६0 रुपये अशा बुलडाणा जिल्हय़ातील एकूण ११ आस्थापनांना अमरावती विभागाने दंडाच्या नोटीस दिल्या आहेत.
बसस्थानकावरील ११ दुकानदारांना दंडाची नोटीस
By admin | Updated: November 21, 2015 02:00 IST