प्रवाशांमध्ये दहशत अन धावपळ

पोलिसांचे प्रात्यक्षिक : बसस्थानकावर पकडले दोन अतिरेकी

बुलडाणा : ठिकाण बुलडाणा बसस्थानक.. वेळ दुपारी ४.४५ ची.. बसस्थानकावर नेहमीप्रमाणे प्रवाशांची धावपळ सुरू होती.. कोणी बसमध्ये जागा पकडण्यात, तर कोणी बसमधून उतरण्यात गर्क होते. तेवढय़ात बसस्थानकावर अचानक पोलिसांच्या गाड्यांचा ताफा येतो. चार पोलिस व्हॅन, दंगाकाबु पथक, डॉगस्कॉड, अग्निशामक दल, रुग्णवाहिका व पोलिसांच्या इतर गाड्या बसस्थानक परिसरात दाखल होतात. एका पोलिस व्हॅनमधून दंगाकाबु पथकातील शस्त्रधारी कमांडो धावतच खाली उतरतात आणि प्रवाशांना बसस्थानक सोडण्याचे आवाहन करतात. प्रवाशांमध्ये प्रचंड घबराट व पळापळ सुरू होते. काही क्षणात बसस्थानक परिसर रिकामा होतो.. नेमके काय होत आहे, हे कोणालाच कळायला मार्ग नव्हता.. तेवढय़ात चिखलीकडे जाणार्‍या बसेसच्या प्लॅटफॉर्मवर उभी असलेली बस क्र. एम. एच. ४0/ ८३९४ या बसला बंदूकधारी कमांडोजने घेराव टाकला. हातातील रिव्हॉल्वर व बंदुका पुढे सरसावल्या. काय होतय, हे कळण्याआधीच कमांडोजचे एक पथक बसमध्ये प्रवेश करते आणि बसमध्ये जोरदार फायरींग सुरू होते. सर्वच स्तब्ध होतात.. सार्‍यांची उत्सुकता ताणल्या जाते..पोलिसांनी कोणावर गोळीबार केला? या बसमध्ये नेमके कोण आहे? डोके चकारावून सोडणार्‍या या घटनेने काही वेळ कोणीच कोणाशी बोलत नाही आणि थोड्याच वेळात बसमधून दोन व्यक्तींना पोलिस बाहेर काढतात. डोक्याला व तोंडाला कापड बांधलेले आणि हातात शस्त्र असलेले हे दुसरे तिसरे कोणी नसून चक्क आतिरेकी होते. बुलडाणा बसस्थानकावर उभी असलेली ही बस अतिरेक्यांनी हायज्ॉक केली होती. अखेर पोलिसांनी शिताफीने या अतिरेक्यांना ताब्यात घेतले आणि सार्‍यांनीच सुटकेचा श्‍वास घेतला; पण थांबा.. हे पकडलेले अतिरेकी खरेखुरे नव्हते तर, बुलडाणा पोलिस दलाच्या दहशतवादी विरोधी कृती दलाने घेतलेले ते एक प्रात्यक्षिक होते. जिल्हा पोलिस अधीक्षक श्यामराव दिघावकर यांच्या मार्गदर्शनाखाली अतिरिक्त पोलिस अधीक्षक श्‍वेता खेडकर, उपविभागीय पोलिस अधिकारी समिर शेख आणि बुलडाणा पोलिस दलातील सर्व अधिकारी व कर्मचार्‍यांनी हे प्रात्यक्षिक यशस्वी केले. बसस्थानकावर अतिरेक्यांच्या टोळीने एखादी बस हायज्ॉक करून प्रवाशांना ओलीस ठेवल्यास अशावेळी प्रवाशांच्या जीविताला धोका न होऊ देता, प्रवाशांची सुखरूप सुटका करून अतिरेक्यांना कसे कंठस्नान घालायचे, याचे हे प्रात्यक्षिक होते. तब्बल अर्धातास चाललेल्या या घटनाक्रमानंतर जेव्हा उपस्थित शेकडो प्रवाशांना ही बाब कळाली तेव्हा अनेकांनी पोलिसांचे कौतुक केले. या प्रात्यक्षिकामध्ये सुरक्षा शाखेचे पोलिस निरीक्षक दीपक कोळी, पोनि. बुधवंत, पोनि. रफिक शेख, पोनि. भांबरे, पवार, खंडारे तर बुलडाणा पोलिस स्टेशनचे पोनि. तांदुळकर, पोकॉं. संजय गवई, देशमुख, काळे, अ.हमीद यांच्यासह जवळपास १५0 पोलिस कर्मचार्‍यांचा सहभाग होता.