..तर मकोका अंतर्गत कारवाई!

वाहतूक कंत्राटदाराकडून होणार पाच लाख रुपयांची वसुली; ईसी अँक्ट अंतर्गत कारवाई.

बुलडाणा : सार्वजनिक वितरण प्रणालीतील धान्य खुल्या बाजारात नेताना पोलिसांनी पकडलेल्या वाहतूक कंत्राटदारावर सार्वजनिक वितरण प्रणाली कायदा (ईसी अँक्ट ) अंतर्गत गुन्हे दाखल करण्यात आले. यावर जिल्हाधिकार्‍यांनी सुनावणी घेतली असून, गुन्हा सिद्ध झाल्यास वाहतूक ठेकेदारावर मकोका अंतर्गत कारवाई करावी, अशी शिफारस पुरवठा विभागाने शासनाकडे केली आहे. सार्वजनिक वितरण प्रणालीतील गहू आणि तांदूळ खामगाव येथील गोदामातून मलकापूर तालुक्यासाठी नेताना दोन ट्रक धान्य गोडाउनला न जाता, ते परस्पर खुल्या बाजारात विक्रीस जात असताना पोलिसांनी हे ट्रक पकडले होते. १२ आणि १३ ऑक्टोबरच्या रात्री वाहतूक कंत्राटदाराचे ट्रक क्रमांक एमपी - ९ केए - ८१६६ मध्ये तांदळाचे ३00 कट्टे, तर ट्रक क्रमांक एमएच २८ - बी - ७00६ मध्ये गव्हाचे ३00 कट्टे खामगाव येथील गोदामातून भरण्यात आले होते. हे धान्य मलकापूर येथील शासकीय गोदाममध्ये साठवायचे होते. खामगाव येथील गोदामाहून निघालेले धान्य मलकापूरच्या गोदामात पोहोचेपर्यंंत या धान्याची जबाबदारी संबंधित वाहतूक कंत्राटदाराची असते. खामगावहून धान्याची उचल करून मलकापूरकडे निघालेले हे दोन्ही ट्रक मलकापूरच्या गोदामावर न जाता, त्यापासून पंधरा किमीपेक्षाही अधिक अंतरावर पोलिसांना दिसून आले. पोलिसांनी चौकशी केली असता, या ट्रकमध्ये सार्वजनिक वितरण प्रणालीचे धान्य आढळून आले. त्यामुळे पोलिसांनी हे दोन्ही ट्रक ठाण्यात जमा करून चौकशी केली असता, सदर धान्य हे खुल्या बाजारात विक्रीस नेत असल्याचे निष्पन्न झाले.