नगराध्यक्षपदासाठी काँग्रेस, भाजपाचा प्रत्येकी एक अर्ज

मोताळा नगराध्यक्ष पदासाठी अर्ज भरण्याच्या शेवटच्या दिवशी काँग्रेस व भाजप या पक्षांतर्फे प्रत्येकी एक अर्ज भरला आहे.

मोताळा (जि. बुलडाणा) : मोताळा नगराध्यक्ष पदासाठी अर्ज भरण्याच्या शेवटच्या दिवशी शुक्रवारी काँग्रेस व भाजप या पक्षांतर्फे प्रत्येकी एक अर्ज भरला आहे. काँग्रेसतर्फे ११ नगरसेवकांचा गट स्थापन करण्यात येऊन नवनिर्वाचित नगरसेवक शेख सलीम बाबा यांची गट नेता म्हणून निवड करण्यात आली. गटातर्फे काँग्रेसच्या नगरसेविका माधुरी देशमुख यांचा एकमेव अर्ज नगराध्यक्षपदासाठी भरण्यात आला. तर भाजपतर्फे बयनाबाई पाटील यांचा अर्ज दाखल करण्यात आला आहे. येत्या २६ नोव्हेंबर रोजी नगरपंचायत मोताळा येथील नगराध्यक्ष व उपाध्यक्ष पदाची निवडणूक होऊ घातली आहे. १७ सदस्यीय मोताळा नगरपंचायतीच्या निवडणुकीत काँग्रेसने अकरा जागा बळकावल्या आहेत. त्यामुळे आमदार सपकाळ यांच्या मार्गदर्शनात माधुरी देशमुख यांचा एकमेव अर्ज नगराध्यक्ष पदासाठी शुक्रवारी दाखल करण्यात आला. या निवडणुकीत भाजपाला एका जागेवर विजय मिळालेला आहे. उर्वरित सदस्यांमध्ये शिवसेना २, मनसे १, राष्ट्रवादी १, अपक्ष १ असे पक्षीय बलाबल आहे. काँग्रेस वगळता इतर पक्षांकडे संख्याबळ कमी असल्याने काँग्रेसचाच उमेदवार नगराध्यक्ष होणार, हे जवळपास निश्‍चित मानल्या जात आहे. अधिकृत निवडणुकीची तारीख २६ नोव्हेंबर असल्याने त्या दिवशीच खरे चित्र समजणार आहे.