नायब तहसीलदारांचे धरणे आंदोलन

पदाची वेतनश्रेणी लागू करावी या मागणीसाठी दिले धरणे.

बुलडाणा: नायब तहसीलदारांना १९९८ च्या शासन निर्णयानुसार राजपत्रित वर्ग दोन अधिकारी पदाचा दर्जा देण्यात आला आहे.; मात्र दर्जा दिला असला तरी त्या पदाची वेतनश्रेणी अद्याप देण्यात आली नाही. शासनाने सदर वेतनश्रेणी लागू करावी या मागणीसाठी तहसीलदार व नायब तहसीलदार संघटनेच्या वतीने मंगळवारी एक दिवसीय धरणे आंदोलन करण्यात आले. त्यानंतर जिल्हाधिकार्‍यांना संघटनेच्या वतीने निवेदन देण्यात आले. या निवेदनात म्हटले आहे की, राज्यातील इतर सर्व राजपत्रित अधिकारी वर्ग २ अधिकारी यांना ४६00 व ग्रेड वेतन सध्या देय आहे.; परंतु नायब तहसीलदार हे राजपत्रित वर्ग २ अधिकारी असूनही त्यांना केवळ ४३00 एवढेच ग्रेड वेतन देय आहे. तालुका पातळीवर महसूल विभाग प्रशासकीय प्रमुख म्हणून काम करतो. त्यांना दर्जा मोठा असला तरी दर्जाप्रमाणे वेतन मिळत नसल्यामुळे ही मागणी देय होईपर्यंंत आंदोलन सुरूच ठेवण्याचा इशारा संघटनेने दिला आहे. त्यानुसार आता पुढील आंदोलन हे १0 डिसेंबर रोजी राहणार असून, जिल्हाधिकारी कार्यालयासमोर एक दिवसीय धरणे आंदोलन करण्यात येणार आहे. तर १ जानेवारी रोजी एक दिवसीय लेखणी बंद आंदोलन करण्यात येणार आहे.