नगरपरिषद कर्मचारी पतसंस्थेच्या निवडणुकीत एकता पॅनल विजयी

नांदुरा नगरपरिषद कर्मचारी पतसंस्थेची निवडणूक; परिवर्तन पॅनलचा धुव्वा.

नांदुरा (जि. बुलडाणा) : नांदुरा नगरपरिषद कर्मचारी पतसंस्थेची निवडणूक ५ जुलै रोजी पार पडली. अत्यंत चुरशीच्या झालेल्या या निवडणुकीत एकता पॅनलने सर्व उमेदवार निवडून आणले आहेत. ७३ मतदार संख्या असलेल्या या संस्थेच्या निवडणुकीत ५७ मतदारांनी मतदानाचा हक्क बजावला. ११ पैकी २ जागा अविरोध निवडून आल्याने नऊ जागांसाठी ५ जुलै रोजी मतदान घेण्यात आले. मतदानानंतर लगेच मतमोजणी झाली. मतमोजणीमध्ये एकता पॅनलचे सर्व नऊ उमेदवार विजयी झाले. यामध्ये आसिफखां छोटेखां, सुनील वाकोडे, दादाराव वाकोडे, अशोक देशमुख, मुरलीधर काटले, राजेश मडके, नितीन खंडारे, आशा सोनवाल व पंचफुला मानकर यांचा समावेश आहे. यापूर्वी याच पॅनलचे हनिफ कुरेशी व पार्वताबाई मोरे हे दोन उमेदवार अविरोध निवडून आले होते. कर्मचारी संघटनेचे अध्यक्ष प्रवीण देशमुख यांच्या नेतृत्वात एकता पॅनेलने निवडणूक लढविली. या निवडणुकीत गणेश सारवान व संजय गोहर यांच्या परिवर्तन पॅनलचे सहा उमेदवार निवडणूक रिंगणात होते; मात्र त्यांचा एकही उमेदवार निवडून येऊ शकला नाही. यावेळी निवडणूक निर्णय अधिकारी म्हणून ए.आर. ऑफिसचे चवरे यांनी काम पाहिले.