मातेची मुलासह विहीरीत उडी घेऊन आत्महत्या

Mother commits suicide with her child रुपाली हरिदास चव्हाण आणि समर्थ हरिदास चव्हाण अशी मृतकांची नावे आहेत.

बुलडाणा: शहरापासून सुमारे दहा किमी अंतरावर असलेल्या हतेडी खुर्द गावातील एका महिलेने तिच्या आठ ते दहा वर्षाच्या मुलासह विहीरीत उडी घेऊन आत्महत्या केल्याची घटना १८ मार्च रोजी उघडकीस आली. दरम्यान या प्रकरणी बुलडाणा ग्रामिण पोलिसांनी आकस्मिक मृत्यूची नोंद केली आहे.रुपाली हरिदास चव्हाण आणि समर्थ हरिदास चव्हाण अशी या घटनेतील मृतकांची नावे आहेत. १७ मार्च रोजी ते शेतात काम करण्यासाठी गेले होते. मात्र परत आले नाहीत. त्यांचा पती हरिदास व नातेवाईकांनी शोध घेतला मात्र ते सापडले नाहीत. दरम्यान १८ मार्च रोजी या दोघांचेही मृतदेह गट नं. २४ मधील सीतारम चव्हाण यांच्या विहीरीत तरंगतांना आढळून आले. याची माहिती गावात कळताच नागरिकांनी घटनास्थळी मोठी गर्दी केली होती. बुलडाणा ग्रामीण पोलिसांनाही याची माहिती देण्यात आली असून पोलिस घटनास्थळी पोहोचले आहे. दोघाही मृतकांचे पार्थिव पोलिसांनी विहीरीतून बाहेर काढले असून उत्तरिय तपासणीसाठी बुलडाणा जिल्हा सामान्य रुग्णालयात ते पाठविण्यात आले असल्याची माहिती बुलडाणा ग्रामीणचे ठाणेदार सारंग नवलकार यांनी दिली. दरम्यान या प्रकरणाची सध्या बारकाईने चौकशी करण्यात येत असल्याचेही त्यांनी स्पष्ट केले.