लोकमत न्यूज नेटवर्क
बुलडाणा : कोरोनापासून बचावासाठी मास्क आणि सॅनिटायझरचा वापर प्रत्येक जण करत आहे. मात्र, अनेकजण त्याचा चुकीच्या पद्धतीने अतिवापर करत असल्याने त्वचेला खाज सुटण्याचे प्रकार समोर येत आहेत. त्वचा विकाराशी निगडित समस्या टाळण्यासाठी मास्क आणि सॅनिटायझरचा वापर मर्यादितच केलेला बरा.
मास्क आवश्यकच; पण असे करा त्वचेचे रक्षण!
सलग तीन ते चार दिवस एकाच मास्कचा वापर आरोग्यासाठी धोकादायक ठरू शकतो. त्यामुळे एक मास्क आठ तासांपर्यंतच वापरणे केव्हाही योग्यच. कोरोनापासून बचावासाठी मास्कचा वापर आवश्यक आहेे. पण एक मास्क मर्यादित कालावधीसाठीच परिधान करावा, असा सल्ला तज्ज्ञ डॉक्टर देतात.
मास्कचा वापर करताना मास्कला वारंवार स्पर्श करणे टाळावे. एकदा वापरलेल्या मास्कची योग्य विल्हेवाट लावावी.
सॅनिटायझरपेक्षा साबण बरे
कोरोनापासून बचावासाठी बहुतांश लोक सॅनिटायझरचा वापर करत आहेत.
मिनिटामिनिटाला हाताला सॅनिटायझर लावत असल्याने अनेकांची त्वचा कोरडी पडून खास सुटत आहे.
सॅनिटायझरच्या अतिवापरापेक्षा आवश्यक असेल तेव्हाच साबणाने हात धुणे बरे.
कुठल्याही गोष्टीचा अतिवापर केल्यास त्याचे दुष्परिणाम समोर येतातच. त्यामुळे सॅनिटायझरचा वापर काही मिनिटांत करण्याऐवजी तास दोन तासांनी करावा. शक्य असल्यास साबणाने हात स्वच्छ धुवावे. शिवाय, मास्कचादेखील आठ तासांपेक्षा जास्त काळ उपयोग नसावा.
- डॉ. किशाेरकुमार बिबे, बुलडाणा