मस, मन प्रकल्पातील पाणी रब्बीसाठी मिळणार

खामगाव मतदारसंघातील मस, मन व इतर प्रकल्पातील पिण्याचे पाणी आरक्षण.

खामगाव: मस, मन प्रकल्पातील पिण्यासाठी पाण्याचे आरक्षण सोडून अतिरिक्त असलेला पाणीसाठा रब्बी पिकांसाठी सोडावा, असे निर्देश भाजपचे ज्येष्ठ नेते आ. भाऊसाहेब फुंडकर व आ.अँड. आकाश फुंडकर यांनी दिल्यानंतर तातडीने अधिकार्‍यांकडून पाणी सोडण्याबाबत नियोजन करण्यात आले आहे. खामगाव मतदारसंघातील मस, मन व इतर प्रकल्पातील पिण्याचे पाणी आरक्षण सोडून उर्वरित पाणीसाठा रब्बी पिकासाठी सोडावा असे पत्र आ. भाऊसाहेब फुंडकर यांनी शेतकर्‍यांच्या मागणीवरून जिल्हाधिकार्‍यांना पाठविले होते. त्यानंतर जिल्हाधिकार्‍यांच्या आदेशानंतर मस, मन या लघू प्रकल्पाच्या पाणी नियोजनाबाबत २0 नोव्हेंबर रोजी पाटबंधारे उपविभागीय कार्यालयात बैठक पार पडली. या बैठकीत आ.अँड. आकाश फुंडकर, मन प्रकल्प विभागाचे कार्यकारी अधिकारी व्ही.आर. भदे, उपविभागीय अधिकारी डी.एस. रघुवंशी, व्ही.डी. पाटील, भाजपा तालुकाध्यक्ष शरद गायकी यांची उपस्थिती होती. यावेळी या प्रकल्पांतर्गत लाभ घेणार्‍या शेतकर्‍यांच्या समस्या आ. भाऊसाहेब फुंडकर यांनी ऐकून घेतल्या. तसेच अधिकार्‍यांकडून प्रकल्पातील उपलब्ध पाणी साठय़ाबाबत माहिती घेतली. रब्बीतील हरभरा व इतर पिकांसाठी तातडीने पिण्याच्या पाण्याचा आरक्षित जलसाठा सोडण्याचे निर्देश त्यांनी यावेळी दिले.