मध्य प्रदेश पोलीस-आरोपींमध्ये चकमक

संग्रामपूर तालुक्यातील निमखेडी येथे गोळीबार

सोनाळा : संग्रामपूर तालुक्यातील निमखेडी या आदिवासीबहुल खेड्यात मध्य प्रदेश पोलीस आणि देशी कट्ट्याच्या सूत्रधारामध्ये चकमक घडली. ही घटना निमखेडी येथील गुरुद्वारा परिसरात सकाळी ११ वाजता घडली असून, या घटनेमुळे गावात भीतीचे वातावरण पसरले आहे.संग्रामपूर तालुक्याच्या सीमा रेषेवर पाचोरी नामक देशी कट्टा बनवण्याचे माहेरघर असल्याचे सर्वश्रुत आहे. पाचोरी हे गाव मध्य प्रदेशात असल्याची नोंद आहे. याठिकाणी वास्तव्यात असलेला त्रिलोकसिंग सुलतानसिंग हा देशी कट्टा बनवणारा मुख्य सूत्रधार आहे. याने बनवलेले देशी कट्टे दिल्ली, नांदेड, खंडवा, नागपूर याठिकाणी मागील काळात पोलिसांनी पकडले होते. पोलिसांना हा मुख्य सूत्रधार सापडला नाही. मध्य प्रदेश खंडवा येथे पाचोरी येथील देशी कट्टा मागील आठवड्यात मध्य प्रदेश पोलिसांनी रेल्वे स्टेशनवर पकडला होता. त्यामध्ये मुख्य चार आरोपी पकडण्यात आले. त्यांनी यातील मुख्य सूत्रधार पाचोरी येथे राहतो, असे सांगून मध्य प्रदेश पोलीस इन्चार्ज पी.आर. डाबर (खंडवा) यांनी २० लोकांची कुमक बनवून पाचोरी मार्गे अंबाबरवा ता. संग्रामपूर जि.बुलडाणा बंदर तलाव येथे आले. चार आरोपी व मध्य प्रदेश पोलीस अंबाबरवा अभयारण्यातील बंदर तलाव येथे मुख्य सूत्रधार त्रिलोकसिंगच्या मागावर होते.निमखेडी (ता.संग्रामपूर) येथे तारासिंग चव्हाण यांचा तेरवीचा कार्यक्रम होता. येथील सिख समाजाच्या गुरुव्दारा येथे पठण चालू होते. गुरुद्वारासमोर आरोपी त्रिलोकसिंग व मध्य प्रदेश पोलीस येऊन त्यांच्यात गोळीबाराची चकमक झाली. या चकमकीत गोळी चरणसिंग चव्हाण यांच्या घराच्या दरवाजाला लागली. या चकमकीत गावातील कोणालाही दुखापत झाली नाही. ही चकमक निमखेडी येथील गुरुद्वारा मंदिराजवळ १० मिनिट चालू होती. यामध्ये मुख्य सूत्रधार फरार होण्यात यशस्वी झाला. आरोपीविरुद्ध गुन्हा दाखलया घटनेची माहिती सोनाळा पोलिसांना मिळताच ठाणेदार सचिनसिंह परदेशी घटनास्थळी दाखल झाले होते. फरार आरोपी त्रिलोकसिंग सुलतानसिंग याचेविरुद्ध कलम ३५३, आर्म अ‍ॅक्ट २८ नुसार गुन्हा दाखल करून एक काडतूस ताब्यात घेतले. अप्पर पोलीस अधीक्षक यशवंत साळुंके यांनी सोनाळा पोलीस स्टेशनला भेट देत घटनेबाबत माहिती जाणून घेतली.