लोकमत न्यूज नेटवर्क
किनगाव जट्टू : पाेषक वातावरणामुळे जाेमात असलेल्या हरभरा पिकावर अळ्यांनी आक्रमण केल्याने किनगाव जट्टू परिसरातील शेतकरी संकटात सापडले आहेत. कृषी विभागाने शेतकऱ्यांना मार्गदर्शन करण्याची मागणी हाेत आहे. किनगाव जट्टूसह परिसरात यावर्षी चांगला पाऊस झाल्यामुळे मुबलक जलसाठा उपलब्ध आहे. त्यामुळे शेतकऱ्यांनी पाण्याचे नियोजन करून रब्बी हंगामातील हरभरा, गहू, मका आदी पिकांची पेरणी केली आहे. वातावरणात वारंवार होणाऱ्या बदलामुळे हरभरा पिकावर अळ्यांचा प्रादुर्भाव दिवसेंदिवस वाढत आहे. कीटकनाशकाची फवारणी करूनही अळयांचा प्रादुर्भाव आटोक्यात येत नसल्याने शेतकरी त्रस्त झाले आहेत. यावर्षी मृग नक्षत्राच्या पहिल्या चरणापासून पाऊस चांगला झाल्याने खरीप हंगाम चांगला येईल, असे वाटत असताना अतिवृष्टीने कहर केल्याने हातातोंडाशी आलेला घास निसर्गाच्या अवकृपेने हिरावला गेला. खरीप हंगामात लागवडीला लागलेला खर्चही वसूल झाला नाही. दरम्यान, परतीच्या पावसामुळे नदी-नाले, तलाव, विहिरीत जलसाठा उपलब्ध असल्याने शेतकऱ्यांनी रब्बी हंगामातील गहू, हरभरा, मका, आदी पिके पेरली. त्यांना महागडी रासायनिक खते दिली. या पिकाची वाढसुद्धा चांगली झाली असून, हरभरा पिकाला घाटेसुद्धा लागले आहे. परंतु, वातावरणात वारंवार होणाऱ्या बदलामुळे हरभरा पिकावर अळीचा प्रादुर्भाव वाढल्याने शेतकरी हवालदिल झाले आहेत. महागडी कीटकनाशके फवारुनही अळी आटोक्यात येत नसल्याने शेतकरी संकटात सापडले आहेत.