कृउबासचा प्रस्ताव पणन संचालकांनी फेटाळला!

शेगाव मार्केट यार्डकरिता जमीन खरेदी प्रकरण; शेतमालकासोबतच्या तडजोडीस मान्यता नाही.

शेगाव: कृषी उत्पन्न बाजार समितीने उच्च न्यायालयात दाखल केलेल्या अपिल प्रकरणात शेतमालकासोबत केलेल्या तडजोडीस महाराष्ट्र कृषी उत्पन्न पणन (विकास व विनियमन) अधिनियम १९६३ चे कलम १२ (१) अन्वये मान्यता मागितली असता कोणत्याही परिस्थितीत कार्योत्तर मान्यता देता येणार नसल्याचे आदेश पणन संचालक, पुणे यांनी दिले आहे. यामुळे बाजार समितीस चपराक बसली असल्याचे बोलल्या जात आहे. येथील कृषी उत्पन्न बाजार समिती मार्केट यार्डकरिता जमीन मालक पुरुषोत्तम हरी पाटील अज्ञा. पालक ज्ञानेश्‍वर पुरुषोत्तम पाटील यांची शेगाव येथील सर्व्हे नंबर ३00/१ मधील ६ हेक्टर २५ आर पैकी ५ हेक्टर ११ आर जमीन विभागीय आयुक्त अमरावती यांची सुधारित अधिसूचना २२ ऑगस्ट १९८३ नुसार आरक्षित केली होती. सदर जागा रु. २५ हजार प्रती एकर मोबदल्याने बाजार समितीला देण्याबाबत जमीन मालकाने संमती दिली होती. या अनुषंगाने ज्ञानेश्‍वर पुरुषोत्तम पाटील यांना सन १९८0-८१ मध्ये तत्कालीन बाजार भावाच्या ८0 टक्के रक्कम बाजार समितीने देवून जमिनीचा ताबा देणेबाबत जमीन मालक यांनी संमती दिली होती. त्याचबरोबर जमीन अधिग्रहणाचे प्रकरण कायद्याचे तरतुदीनुसार सुरू झाल्यामुळे उर्वरित २0 टक्के रक्कम तसेच भूमिअधिग्रहण अधिकारी ज्या नियमानुसार मोबदला ठरवतील ती रक्कम बाजार समिती जमीन मालकास देईल असे लेखी कळविले होते; परंतु जमीन मालकाने मागितलेली २५ हजार रुपये एकर भाव न देता ५0 हजार रुपये हेक्टरी या भावाने एकतर्फी रक्कम जिल्हाधिकार्‍यांनी ठरविली होती. त्यानुसार १८ फेब्रुवारी १९८१ रोजी १ लाख ७0 हजार १६ हजार ८00 रूपये रक्कम जमीन मालक यांना देण्यात आली होती. त्यानंतर २२ ऑगस्ट १९८३ रोजी एमआरटीपी अँक्टप्रमाणे हेक्टरी रु. ३ लाख प्रमाणे शेतमालक ज्ञानेश्‍वर पाटील यांना ५ हेक्टर ११ हजार या जमिनीचा मोबदला रु. २५ लाख ९६ हजार २५५ असा तत्कालीन भूमिलेख अधिकारी डी.एन. रायपुरे यांनी निवाडा पारित करून मंजुरीकरिता शासनाच्या महसूल व वन विभागाकडे पाठविला होता.