देऊळगावराजा तालुक्यातील अंढेरा येथील ज्ञानेश्वर म्हस्के यांनी २०१८ मध्ये आण्णासाहेब आर्थिक विकास महामंडळाकडे १० लाखांचा कर्जपुरवठा करण्यासाठी अर्ज केला होता. महामंडळाकडून त्यांचा अर्ज पात्र ठरवण्यात आला होता. स्टेट बँक ऑफ इंडिया देऊळगावमही शाखेकडून कर्ज प्रकरण दाखल करून घेतल्याने व मंजुरीसाठी बुलडाणा येथे पाठवले असता, सर्व कागदपत्रांची पूर्तता करा तुमचे कर्ज प्रकरण मंजूर करतो, असे आश्वासन शाखा व्यवस्थापक व अधिकाऱ्यांनी दिले. दरम्यान, ज्ञानेश्वर म्हस्के यांनी बँकेच्या खात्यामधून अपेक्षित व्यवहार केला असता त्यानंतरही कोणतेही गहाणखत लागत नसतानाही तीन वर्षांपासून कर्ज नाकारले जात असल्याने म्हस्के यांनी उपोषणाचा मार्ग अवलंबला. १५ ऑगस्टपासून ज्ञानेश्वर म्हस्के यांचे जिल्हाधिकारी कार्यालयासमोर उपोषण सुरूच आहे.
बँक अधिकाऱ्यांकडून टाळाटाळ
देऊळगावमही स्टेट बँक शाखा व्यवस्थापक चित्राल यांनी उत्तर देण्यास टाळाटाळ केली. स्टेट बँक बुलडाणा अधिकारी अमर कुलकर्णी यांनी लोन केससाठी स्टॅम्प ड्युटी भरण्यास सांगितली होती. त्यांनी आज फोन घेण्यास टाळले तर दीपक नांदेश्वर यांनी प्रकरण स्थानिक शाखेकडे पाठवून दिले असल्याची माहिती दिली.