रागाच्या भरात मुलाने केला वडिलांचा खून

मेहकरचे ठाणेदार आत्माराम प्रधान यांनी दिलेल्या माहितीनुसार शहरातील समतानगरात राहत असलेले गजानन संपत गवई (५५) हे अमडापूर येथील जिल्हा केंद्रीय सहकारी बँकेच्या शाखेत व्यवस्थापक होते. घरामध्ये ते त्यांची पत्नी व २१ वर्षीय मुलगा शुभम राहतो. औरंगाबाद येथे इंजिनिअरिंगच्या दुसऱ्या वर्षाला तो आहे. दरम्यान, शनिवारी शुभमचे वडील गजानन गवई हे घरातच आराम करत असताना शुभमने रागाच्या भरात कुऱ्हाडीचे वार करून त्यांना ठार केले. त्यानंतर पोलीस ठाण्यात जातो म्हणून तो घरातून बाहेर पडला. दरम्यान, या प्रकाराबाबत शेजारच्यांनी मेहकर पोलिसांना माहिती दिली. त्यामुळे घटनेचे गांभीर्य पाहता पोलीस निरीक्षक आत्माराम प्रधान, पोलीस उपनिरीक्षक विजय घुले, गणेश लोढे व कर्मचारी तत्काळ घटनास्थळी पोहोचले व त्यांनी शुभमशी संपर्क साधला असता तो मेहकर पोलीस ठाण्याच्या परिसरातच घुटमळत होता तेथून त्यास पोलिसांनी ताब्यात घेतले. दरम्यान, मेहकर पोलिसांच्या प्राथमिक तपासामध्ये शुभम हा मानसिक रुग्ण होता, अशी माहिती समोर येत आहे. त्याच्यावर उपचारही सुरू होते असे पोलिसांनी सांगितले. आई-वडिलांनी अभ्यास कर, मोबाईल कमी बघ, असे म्हटले की, तो चिडचिड करायचा त्यातूनच त्याने वडील गजानन गवई यांचा खून केला असावा असा कयास प्राथमिक स्तरावर पोलीस निरीक्षक आत्माराम प्रधान यांनी व्यक्त केला आहे. मृत गजानन गवई यांना शुभमसह चार मुली असून त्या विवाहीत आहेत. या घटनेचा पुढील तपास सध्या मेहकर पोलीस करत आहेत.