बुलडाणा : आर. आर. (आबा) पाटील यांचे पुण्यतिथी निमित्ताने १६ फेब्रुवारी रोजी सन २०१९-२० अंतर्गत तालुका सुंदर व जिल्हा सुंदर गाव पुरस्कार योजनेचे बक्षीस वितरण करण्यात आले. सुंदर गाव स्पर्धेत माेताळा तालुक्यातील माकाेडी गावाने जिल्ह्यातून प्रथम क्रमांक पटकावला आहे.
या स्पर्धेच्या पुरस्कार वितरणाचा कार्यक्रम जिल्हा परिषदेच्या श्री छत्रपती शिवाजी सभागृह येथे आयोजित करण्यात आला. यावेळी जिल्हा परिषदेच्या अध्यक्ष मनिषा पवार, उपाध्यक्षा कमल बुधवत, सभापती रियाजखँ पठाण, जिल्हाधिकारी एस. रामामूर्ती, जिल्हा परिषदेच्या मुख्य कार्यकारी अधिकारी भाग्यश्री विसपुते, पं.स. मोताळा सभापती प्रकाश बस्सी आदी उपस्थित होते.
याप्रसंगी जि.प अध्यक्ष मनिषा पवार म्हणाल्या, या स्पर्धेत सहभाग नोंदवीत पारितोषिक मिळालेल्या ग्रामपंचायतींपासून अन्य ग्रामपंचायतींनी प्रेरणा घ्यावी. पुढील वर्षी आपल्या ग्रामपंचायतीला कसे पारितोषिक मिळेल, यादृष्टीने काम करावे. ग्रामविकासाच्या योजना अधिकाधिक प्रभावीपणे राबवून ग्रामपंचायतींनी आपली ग्रामविकासातील भूमिका अधोरेखित करावी. कार्यक्रमाचे प्रास्ताविक उपमुख्य कार्यकारी अधिकारी राजेश लोखंडे यांनी केले. त्यांनी स्पर्धेची माहिती दिली. सन २०१९-२० चे उत्कृष्ट कामगिरी केलेले तालुका सुंदर गाव व जिल्हा सुंदर गाव स्पर्धेतील पारितोषिक विजेते ग्रामपंचायतींचे सरपंच, ग्रामसेवक व विस्तार अधिकारी (पंचायत) यांना प्रमाणपत्र देऊन गौरविण्यात आले. या पुरस्कार योजनेंतर्गत राज्य शासनाकडून तालुका सुंदर गाव याकरिता १० लक्ष रुपये व जिल्हा सुंदर गाव याकरिता ४० लक्ष रुपये पारितोषिक घोषित करण्यात आले आहे. त्यानुसार पारितोषिक विजेत्या गावांना पारितोषिक रकमेचा धनादेश देण्यात आला. संचालन चंद्रशेखर जोशी यांनी तर आभारप्रदर्शन सहा. गट विकास अधिकारी भरत हिवाळे यांनी केले.
या ग्रामपंचायतींना मिळाला पुरस्कार
जिल्हा सुंदर गाव पुरस्कार विजेती ग्रामपंचायत : माकोडी ता. मोताळा, तालुका सुंदर गाव पारितोषिक विजेत्या ग्रामपंचायती : बुलडाणा-हतेडी खु, चिखली-सावरगाव डुकरे, दे. राजा - खल्याळ गव्हाण, सिं.राजा-आडगाव राजा, मेहकर-आंध्रुड, लोणार-आरडव, खामगाव-वझर, शेगाव-खातखेड, संग्रामपूर-उमरा, जळगाव जामोद-सुनगाव, नांदुरा-खुमगाव, मलकापूर-विवरा, मोताळा-माकोडी.