आत्महत्याग्रस्त शेतकरी कुटुंबांना आर्थिक मदत

दे.राजा येथील गणेशोत्सवात सहभागी मंडळांनी आत्महत्याग्रस्त शेतकरी कुटुंबांना आर्थिक मदत मदत देत आदर्श स्थापित केला.

देऊळगावराजा (जि. बुलडाणा) : येथे सार्वजनिक गणेशोत्सवात सहभागी विविध गणेश मंडळांच्या पदाधिकार्‍यांच्या सत्कारासह आत्महत्याग्रस्त कुटुंबांसाठी आर्थिक मदत सोमवारी पाठविण्यात आली. यासाठी संतोष अंभोरे मित्रमंडळ व आदिशक्ती ग्रूपने पुढाकार घेतला. सर्वत्र दुष्काळाचे सावट असून, गणेश मंडळांनी अनावश्यक खर्च टाळावा. अनावश्यक बाबींवर होणारा खर्च टाळून नाना पाटेकर व मकरंद अनासपुरे यांनी आत्महत्याग्रस्त शेतकर्‍यांच्या कुटुंबीयांना आर्थिक् मदत देण्याचे काम सुरू केलेले आहे. या पृष्ठभूमिवर स्थानिक संत सावता सार्वजनिक गणेश मंडळाच्यावतीने रा.कॉं.तालुकाध्यक्ष दीपक बोरकर यांच्या नेतृत्वात नाम फाउंडेशनच्या बँक खात्यात १२ हजार १११ रुपयांची आर्थिक मदत पाठविण्यात आली. गेल्या दहा दिवसात अनेक गणेश मंडळांकडून गणपतीसमोर विविध कार्यक्रम आयोजित केले. त्या गणेश मंडळांचा उत्साह वाढविण्याकरिता अंभोरे मित्रमंडळ व आदिशक्ती ग्रूपच्यावतीने यावर्षीपासून सार्वजनिक गणेशोत्सवात प्रत्येक गणपती मंडळाला सन्मानित करण्यासाठी गणेशोत्सव सत्कार समितीची स्थापना करुन गणेश विसर्जन मिरवणुकीत सहभागी होणार्‍या गणेश मंडळांच्या पदाधिकार्‍यांचा सन्मान करण्यात आला. त्यांना श्रींची आकर्षक मूर्ती, शाल, टोपी भेट स्वरूपात दिली. याप्रसंगी गणेश विसर्जन मिरवणूक शांततेत पार पडण्यासाठी पोलीस प्रशासनाकडून चोख बंदोबस्त ठेवण्यात आला होता. या कार्यक्रमाला यशस्वी करण्यासाठी संतोष अंभोरे मित्रमंडळ व आदिशक्ती ग्रूपचे पदाधिकारी व कार्यकर्ते यांनी अथक परिश्रम घेतले.