ऑनलाइन लोकमत/संतोष आगलावे
बुलडाणा, दि. 24 - गेल्या काही दिवसांपासून पावसाने दडी मारल्याने शेतकरी हतबल झाला असून पारंपरिक पद्धतीनं धोंडी मागून तो वरुणराजाची विनवणी करताना दिसत आहे.
जून महिन्याच्या सुरुवातीला पावसाने हजेरी लावल्याने शेतक-यांना आनंद झाला होता. पावसाचे आगमन होत असल्याचे पाहून शेतक-यांनी शेतमशागतीची पेरणी युद्धस्तरावर केली. तर काही शेतक-यांनी पेरणीसुद्धा उरकून घेतली.
मात्र गत काही दिवसांपासून पावसाने दडी मारली आहे. पिकांना अंकुर फुटत असताना पाण्याची नितांत गरज असून पाऊस मात्र बेपत्ता झाला आहे. त्यामुळे पेरणी करणा-या शेतक-यांच्या तोंडचे पाणी पळाले आहे.
शेतकरी पावसाची चातकाप्रमाणे वाट पाहत असून वरुणदेवतेची विनवणी करण्यासाठी पारंपारिक धोंडीचा सहारा घेत आहेत. बोरखेड येथील शेतक-यांच्या वतीने शनिवारी गावातून धोंडी धोंडी पाणी दे असे म्हणत गावातून फेरी काढण्यात आली. यावेळी गावक-यांनी धोंडी मागणा-या मुलांचे स्वागत करत त्यांच्याशी सहमती दर्शविली.