गोदामाअभावी कृषी साहित्याची धूळधाण

लोणार येथील प्रकार; कृषी विभागाचे दुर्लक्ष.

लोणार (बुलडाणा) : पारंपरिक शेतीला यांत्रिकीकरणाची जोड देऊन अधिकाधिक उत्पादन घेण्यासाठी कृषी विभागाकडून अनुदान स्वरूपात विविध कृषी साहित्यांचे वाटप करण्यात येते; परंतु तालुक्यातील शेतकर्‍यांसाठी आलेले हे कृषी साहित्य ठेवण्याकरिता तालुका कृषी कार्यालयाच्या मालकीचे गोदामच उपलब्ध नसल्याने कृषी साहित्याची दाणादाण होत आहे. कृषी विभागाच्या दुर्लक्षामुळे शासनाचे हे कृषी साहित्य धूळ खात पडलेले आहे. शेतकर्‍यांना शेती करताना पारंपरिक अवजारांच्या जागी आधुनिक विकसित साहित्य लोकवर्गणी भरून वाटप करण्यात येते. त्यामध्ये पेरणी यंत्र, मोटार, पंपसेट, पॉवर स्प्रे, नॅपसेट, लोखंडी नांगर, बी-बियाणे, औषधे, स्प्रिंक्लर सेट, पाईप यासह इतर काही कृषी साहित्य विविध योजनेंतर्गत बाजारभावापेक्षा कमी दरात शेतकर्‍यांकरिता कृषी कार्यालयात उपलब्ध आहे; परंतु शेतकर्‍यांकडून लोकवर्गणी भरण्यास प्र ितसाद मिळत नसल्यामुळे हे साहित्य लाभार्थ्यांअभावी गावोगावी इतरत्र धूळ खात पडलेले आहे. कृषी विभागाकडून शेतकर्‍यांना वाटपासाठी येणारे साहित्य ठेवण्याकरिता गोदामच उपलब्ध नसल्याने कृषी कार्यालयाला हे साहित्य नाइलाजास्तव ग्रामपंचायत कार्यालयाच्या आवारात किंवा कृषी सेवकांच्या घरात ठेवावे लागत असल्याचे वास्तव समोर येत आहे. गोदामासाठी भाड्याची तरतूद नसल्यामुळे कृषी विभागाला भाड्यानेही गोदाम घेता येत नाही. सद्य:स्थितीत तालुक्यातील वडगाव तेजन येथे पेरणी यंत्र व इतर काही कृषी साहित्य तसेच महारचिकना येथील मोटारपंप व पंपसेट, देऊळगाव कुंडपाळ येथे लेजर आदी साहित्य धूळ खात पडलेले आहे. यापैकी साहित्य चोरीला गेल्यास भुर्दंड कृषी विभागाला बसत आहे. तरी आलेले साहित्य ठेवण्यासाठी तालुकास्तरावर गोदामाची तरतूद होणे आवश्यक आहे.