जालना येथून आग्रा येथे बाजरीचे बियाणे घेऊन महेंद्रसिंग नामक ट्रकचालक जात होता. समुद्र सपाटीपासून २१९० फूट उंचीवर असलेल्या बुलडाणा शहरालगत असलेल्या राजूर घाटात सकाळी साडेआठ वाजेच्या सुमारास ट्रकच्या ब्रेकमधील वायसर खराब झाल्याने ट्रकचे ब्रेक लागत नव्हते. त्यामुळे उतारावर हा ट्रक अनियंत्रित झाला. त्यातच राजूर घाटातील हनुमान मंदिरानजीक जवळपास ८० अंशामध्ये असलेले वळण समोरच असल्याने हा ट्रक सुमारे ४०० फूट दरीत कोसळतो की काय? अशी भीती निर्माण झाली होती. मात्र, ट्रकचालक महेंद्रसिंग याने कल्पकता लढवीत मंदिरानजीकच्या संरक्षक कठड्यावर ट्रक धडकवला. त्यामुळे संरक्षक कठड्याचे मोठे नुकसान झाले असले तरी चालकाचे प्राण वाचण्यासोबतच ट्रकही दरीत कोसळता कोसळता वाचला. काही स्थानिकांनी हा थरारक प्रसंग स्वत: बघितला. सुदैवाने या घटनेच कुठलीही प्राणहानी झाली नाही. ट्रकची काही चाके ही संरक्षक कठड्यात अडकल्याने मोठा अपघात टळला.
या अपघाताचे वृत्त कळताच बुलडाणा पोलीस ठाण्यातील पोलीस उपनिरीक्षक विनायक रामोड व त्यांच्या सहकाऱ्यांनी घटनास्थळी धाव घेत मदतकार्य केले व घाटातील वाहतूक सुरळीत केली.
--गेल्या आठवड्यातही अपघात--
गेल्या आठवड्यातही राजूर घाटात याच घटनास्थळाजवळ नारळ घेऊन जाणारा ट्रक पहाटे सहाच्या सुमारास थेट दरीत कोसळला होता. त्यात चालकाचा मृत्यू झाला होता, तर त्याचा सहायक गंभीर जखमी झाला होता. या अपघातानंतरची ही दुसरी घटना आहे.
--ट्रकचालकाकडून नुकसान भरपाई--
या अपघातातील ट्रक चालकाचे नशीब चांगले म्हणून हनुमान मंदीरानजीकच्या संरक्षक कठड्यावर हा ट्रक धडकला व त्याचे प्राण वाचले. या घटनेमुळे मंदिरालगतच्या संरक्षक कठड्याचे झालेले नुकसान भरून काढण्यासाठी ट्रकचालकाने मदत केली असल्याची माहितीही पोलीस उपनिरीक्षक विनायक रामोड यांनी दिली.