लोकमत न्यूज नेटवर्क
बुलडाणा : कोरोना महामारीमुळे रेल्वेची थांबलेली चाके पुन्हा धावायला लागली आहेत. मात्र, आरक्षण करून रेल्वेचा प्रवास करावा लागत आहे. परिणामी लोकल गाड्या कमीच असल्याने फक्त कोरोना पॅसेंजर रेल्वेतूनच पसरतो का? असा सवालही या निमित्ताने उपस्थित केला जात आहे.
जिल्ह्यातील शेगाव रेल्वेस्थानकातून सध्या विदर्भ एक्स्प्रेस, महाराष्ट्र एक्स्प्रेस, गीतांजली एक्स्प्रेस, निजामुद्दीन एक्स्प्रेस, अहमदाबाद एक्स्प्रेस, समता एक्स्प्रेस गाड्यांचे येणे-जाणे होत आहे. मुंबई-हावडा या मार्गावर प्रवाशांची मोठी लगबग असते. शेगाव रेल्वेस्थानकातून सहा एक्स्प्रेस गाड्यांमधून शेकडो प्रवासी प्रवास करीत आहेत. मग पॅसेंजर गाड्या का बंद आहेत, याचे उत्तर दिले जात नाही, हेच एक न उलगडणारे कोडे आहे. पॅसेंजर गाड्या बंद असल्याने प्रवाशांना मात्र तिकिटांचा भुर्दंड बसत आहे. त्यामुळे पॅसेंजर गाड्या सुरू करण्याची मागणी प्रवाशांच्या वतीने करण्यात येत आहे.
सध्या सुरू असलेल्या एक्सस्प्रेस
विदर्भ एक्स्प्रेस, महाराष्ट्र एक्स्प्रेस, गीतांजली एक्स्प्रेस, निजामुद्दीन एक्स्प्रेस, अहमदाबाद एक्स्प्रेस
सध्या एकही स्पेशल ट्रेन सुरू नाही
शेगाव रेल्वेस्थानकातून सहा एक्स्प्रेस गाड्या धावत आहेत. या रेल्वेस्थानकातून ३४ रेल्वेगाड्या धावत असतात. पॅसेंजर नसल्याने अडचण होते.
प्रवाशांना बसतो भुर्दंड
विशेष रेल्वेगाड्यांच्या नावाखाली प्रवाशांची लूट सुरू आहे. परिणामी हा आर्थिक भुर्दंड बसू नये म्हणून पॅसेंजर रेल्वे सुरू करण्याची नितांत गरज आहे. कोरोनाची धास्ती न बाळगता प्रवाशांचे हितही लक्षात घेणे गरजेचे आहे.
एक्सप्रेसचा प्रवास परवडत नाही. रेल्वेचा प्रवास पुन्हा सुरू केला आहे. सर्वसाधारण प्रवाशांना लोकल भाडे आकारायला हवे. मात्र, विशेष रेल्वेगाड्यांच्या नावावर प्रवास तिकीट दुप्पट घेतले जात आहे, याचा आम्हाला फटका बसत आहे.
- राजेश बुजाडे, प्रवासी
लोकल गाडीने स्वस्तात प्रवास करता येते. एक्सप्रेस गाडीचे तिकीट दुपटीपेक्षा जास्त आहे. त्यामुळे आर्थिक भुर्दंड बसतो. या मार्गावर पॅसेंजर रेल्वेची संख्या वाढवायची गरज आहे. रेल्वे प्रशासनाने लक्ष देण्याची गरज आहे.
- आकाश टेकाडे, प्रवासी