जिल्हा परिषद सदस्य वाघ यांना अटक

सिंदखेडराजा येथील वीज उपअभियंत्यास मारहाण प्रकरण.

सिंदखेडराजा (जि. बुलडाणा) : जिल्हा परिषद सदस्य विनोद वाघ यांनी वीज वितरण कंपनीचे उपअभियंता अनसिंगकर यांना चोप दिल्याची घटना २३ जुलै रोजी घडली. दरम्यान, २४ जुलै रोजी जि.प. सदस्य विनोद वाघ यांना सिंदखेडराजा पोलिसांनी अटक केली. तीन दिवसांपूर्वी स्थानिक राजवाड्यासमोर राहणारे शिवजी कव्हळे, जया शिवाजी कव्हळे, माया हरेल व किशोर हरेल यांच्या घरावर ३२ के.व्ही.ची वीज वाहकतार अचानक तुटून पडली. या तारेत वीज प्रवाह सुरु असल्याने हे चारही जण जखमी झाले असून, त्यांच्यावर उपचार सुरू आहे. दरम्यान, २३ जुलै रोजी वीज वितरण कंपनीचे उपअभियंता मनोज अनसिंगकर, डी.एम.वरसे यांसह काही कर्मचारी तुटलेली तार जोडण्यासाठी गेले असता एका महिलेने ह्यह्यप्रथम आम्हाला नुकसान भरपाई द्या, त्यानंतर तुमचे काम कराह्णह्ण, असे म्हटले त्यावरुन डी.एम.वरसे या लाईनमनने सदर महिलेचा हात धरुन विनयभंग केला तर मनोज अनसिंगकर यांनी अश्लील भाषा वापरली. एका गरीब पीडित महिलेसोबत वीज वितरण कंपनीचे कर्मचारी हुज्जत घालीत असल्याचा प्रकार विनोद वाघ यांनी पाहिला. यांनी आपले वाहन थांबवून घडलेल्या घटनेची माहिती घेतली. दरम्यान, वाघ यांनी अनसिंगकर यांना चांगला चोप दिला. अनसिंगकर यांच्या तक्रारीवरून सिंदखेडराजा पोलिसांनी विनोद वाघ, छगन झोरे यांच्यासह १0 ते १५ जणांविरुद्ध ३५३, ५0४, ५0६, १४३, ३३२, ३८४, ४४८ भादंविनुसार गुन्हा दाखल केला आहे. सदर महिलेने दिलेल्या तक्रारीवरून डी.एम.वरसे व मनोज अनसिंगकर यांच्या विरुद्ध ३५४ भादंविनुसार गुन्हा दाखल करण्यात आला आहे.