बुलडाणा : कोरानाबाधितांवर उपचारासाठी आवश्यक असलेल्या रेमडेसिविर, टोसिलिझुआन अैाषधानंतर आता म्युकरमायकोसिसच्या इलाजासाठी आवश्यक असलेले ॲफ्कोटेरीसीन या अैाषधाचेही वितरण जिल्हाधिकारी कार्यालयाने आपल्या नियंत्रणात घेतले आहे. म्युकरमायकोसिस आजाराच्या अैाषधांचाही काळाबाजार होण्याची तथा त्याचा तुटवडा निर्माण होण्याची शक्यता पाहता जिल्हा आपत्ती व्यवस्थापन प्राधिकरणाचे अध्यक्ष या नात्याने जिल्हाधिकारी एस. रामामूर्ती यांनी या अैाषधांचे वाटप हे प्रशासनाच्या नियंत्रणात घेतले आहे.
मुळातच म्युकरमायकोसिसच्या इलाजासाठी आवश्यक असलेली औषधी व इंजेक्शन ही महागडी आहेत. किमान दोन हजार रुपये ते २० हजार रुपयांपेक्षाही अधिक किमतीचे हे इंजेक्शन आहे. त्यातील घटकानुसार या इंजेक्शनचीही किंमतही वाढत जाते. त्यातच वर्तमान स्थितीत त्याचा असलेला तुटवडा पाहता जिल्ह्यातही काळाबाजार होण्याची शक्यता आहे. त्यानुषंगाने शासनाच्या निर्देशानुसार जिल्हाधिकारी एस. रामामूर्ती यांनी आता या इंजेक्शन वितरणाचे नियंत्रणही जिल्हा प्रशासनाकडे घेण्यात आले आहे. त्यातच या इंजेक्शनसाठी आवश्यक असलेले घटक किंवा कच्चा माल हा देशाला परदेशातून घ्यावा लागतो. बुरशीजन्य आजाराचे प्रमाण अलीकडील काळात वाढले आहे. त्यामुळे केंद्र सरकारने रेमडेसिविरप्रमाणेच म्युकरमायकोसिसच्या आजारारामध्ये लागणारे इंजेक्शनही आपल्या नियंत्रणात घेतले असून केंद्र सरकार ते राज्य सरकारांना वितरण करणार आहे. त्यानुषंगाने जिल्हास्तरावरही जिल्हाधिकारी यांच्याकडे आपत्ती व्यवस्थापन प्राधिकरणाचे अध्यक्ष म्हणून इंजेक्शन वितरणावरील नियंत्रण आले असल्याची माहिती सूत्रांनी दिली.
--म्युकरमायकोसिसमुळे चार जणांचा मृत्यू--
बुलडाणा जिल्ह्यातही म्युकरमायकोसिसच्या रुग्णांची संख्या २७ पर्यंत पोहोचली असून, यातील चार जणांचा आतापर्यंत मृत्यू झाला असल्याचे सूत्रांनी स्पष्ट केले आहे. यासोबतच बुलडाणा जिल्ह्यात तीन रुग्णांवर सध्या उपचार करण्यात येत आहेत. या आजाराचा मृत्यूदर हा जवळपास ५० टक्क्यांच्या आसपास आहे. त्यामुळे या आजाराचे गांभीर्य वाढले असल्याचे सूत्रांनी सांगितले.
--अैारंगाबाद, नागपूरमध्ये उपचार--
म्युकरमायकोसिसचा इलाज महागडा आहे. त्यामुळे बुलडाणा जिल्ह्यातील रुग्णांवर प्रामुख्याने अैारंगाबाद आणि नागपूर येथे उपचार करण्यात येत आहेत. एका रुग्णास किमान ४० इंजेक्शन द्यावे लागतात. त्यातच इंजेक्शनची कमी असलेली उपलब्धता पाहता बाहेर जिल्ह्यात रुग्णांवर उपचार करण्यास प्राधान्य देण्यात येत आहे. जळगाव जामोद तालुक्यातीलही एका रुग्णास २१ मे रोजी उपचारासाठी नागपूर येथे पाठविण्यात आले असल्याची माहिती आहे.
--मेडिकल स्टोअर्सनेही नोंदवली मागणी--
म्युकरमायकोसिसवरील इंजेक्शनची वाढती मागणी पाहता बुलडाणा जिल्ह्यातील मेडिकल स्टोअर्सनीही नागपूर येथील अैाषधी डेपोकडे जवपास २०० इंजेक्शनची मागणी नोंदवली असल्याची माहिती अन्न व अैाषध प्रशासन विभागातील सूत्रांनी दिली. दुसरीकडे राज्यात भिवंडी, पुणे आणि नागपूर येथे अैाषधी डेपो आहे. जिल्ह्यासाठी नागपूर सोयीस्कर असल्याने तेथे मागणी नोंदविण्यात येते.