चिखली अर्बनद्वारे सतीश गुप्तांच्या हस्ते हार्वेस्टरचे वितरण

दि चिखली अर्बन को-ऑप बँक लि.चिखलीच्या देऊळगाव मही शाखेच्या वतीने पिंप्री आंधळे येथील शेतकरी सुखदेव गणपत डोईफोडे यांना हार्वेस्टर खरेदीसाठी १७ लाख रुपयांचे वाहन कर्ज देण्यात आले आहे. परराज्यातील हार्वेस्टर आपल्या भागात येऊन मोठा व्यवसाय करून जातात. आपल्या भागातील युवा शेतकरी बांधवांनी समोर येऊन या व्यवसायात यावे, त्यासाठी आपल्या परिसरातील शेतकरी बांधवांसाठी कर्ज उपलब्ध करून देण्यासाठी आपण कायम खंबीरपणे त्यांच्या पाठीशी उभे राहू, अशी ग्वाही बँकेचे अध्यक्ष सतीष गुप्ता यांनी दिली. दि चिखली अर्बन बँक अत्यंत कमी व्याजदरावर व कोणतेही छुपे चार्जेस न लावता त्वरित कर्ज उपलब्ध करून देत आहे, याचा लाभ घ्यावा, असे आवाहन बँकेच्यावतीने करण्यात आले. सतीश गुप्ता यांनी हार्वेस्टरचे विधिवत पूजन करून शेतकरी सुखदेव डोईफोडे यांच्याकडे वाहनाच्या चाव्या सुपूर्द केल्या. यावेळी बँकेचे उपाध्यक्ष पुरूषोत्तम दिवटे, संचालक मनोहरराव खडके, भगवान डोईफोडे, नाना आंधळे, अनिल कायंदे, सिद्धेश्वर डोईफोडे, रामेश्वर आंधळे, शिवाजी आंधळे, रामदास काकड, विष्णू वाघ, संतोष नागरे, रमेश नागरे, शाखाधिकारी दिनकर कुटे आदींसह शेतकरी उपस्थिती होते. (वा. प्र.)