धुर्‍याचे भांडण; सख्ख्या भावाचा खून

शेतातील बांध फोडल्याच्या कारणावरुन रागाच्या भरात लहान भावाने मोठय़ा भावाच्या पोटात चाकू खुपसून त्याची निर्घृण हत्या केली.

देऊळगावराजा : शेतातील बांध फोडल्याच्या कारणावरुन रागाच्या भरात लहान भावाने मोठय़ा भावाच्या पोटात चाकू खुपसून त्याची निर्घृण हत्या केली. बायगाव खुर्द येथे गुरुवारी सकाळी ११ च्या दरम्यान ही घटना घडली. बायगाव खुर्द गावातील शेषराव रामराव जायभाये वय ४0 आणि केशवराव रामराव जायभाये वय ३५ या दोन सख्ख्या भावाची शेती शेजारी आहे. शेषराव यांनी त्यांच्या वाटणीत नांगरणीचे काम पूर्ण केले. वाटणीचा बांध फोडल्याने केशवराव संतापला होता. गुरुवारी सकाळी केशवराव याने गावचे पोलिस पाटील रामदास नागरे व तंटामुक्त समिती अध्यक्ष मधुकर काकड यांना ही बाब सांगून शेतात चला, अशी विनंती केली. त्यानुसार हे सर्वजण शेतात गेले. शेषराव त्यांची पत्नी वंदना व मुलगा कारभारी हे सुध्दा शेतात हजर होते. बांध फोडला की नाही, याची पाहणी पो.पा.नागरे व मधुकर काकड करत असताना आरोपी केशवराव याने शेषरावची पत्नी वंदावर चाकूने हल्ला चढवला; मात्र तीने प्रतिकार केला. त्याचवेळी शेषरावचा मुलगा याच्यावरही हल्ला करण्याचा प्रयत्न केशवरावने केला. हे बघून शेषराव धाऊन गेले; मात्र केशवराव याने शेषरावच्या पोटात चाकू खुपसला आणि चाकू पुन्हा बाहेर काढून वहिनी वंदनावर हल्ला केला. यात त्याच्या खांद्याला मार लागला. हा सगळा प्रकार अनपेक्षितपणे घडल्याने सारेच धास्तावले होते; मात्र प्रसंगावधान ठेवत रामदास नागरे व मधुकर काकड यांनी आरोपी केशवरावला पकडल्याने पुढील अनर्थ टळला. पोटात चाकू खुपसून वर्मीघाव झाल्याने शेषराव जायभाये यांना रक्तस्त्राव होऊन ते गंभीर जखमी झाले. त्यांना तातडीने देऊळगावमही ग्रामीण रुग्णालयात आणले; मात्र प्रकृती गंभीर असल्याने जालना येथे पाठवले. तिथे डॉक्टरांनी तपासून शेषराव जायभाये यांना मृत घोषित केले. मृतकाची पत्नी वंदना जायभाये यांच्यावर प्राथमिक उपचार झाल्यानंतर त्यांनी अंढेरा पो.स्टे.ला फिर्याद दिली. घटनास्थळावर हल्ला केल्यानंतर आरोपी केशवराव जायभाये सरळ अंढेरा पो.स्टे.ला हजर झाला. पोलिसांनी लगेच त्याला अटक करुन कोठडीत डांबले. जालना येथे पोस्टमार्टम झाल्यानंतर आज सायंकाळी बायगाव खुर्द येथे मृतक शेषराव यांच्या पार्थिवावर अंत्यसंस्कार करण्यात आले. पुढील तपास अंढेरा पोलिस करीत आहेत.