माय-लेकाचा अपघातात मृत्यू

मृत देवधाबा येथील; रावेर मार्गावरील घटना.

देवधाबा (जि. बुलडाणा): येथील ज्योती पुरुषोत्तम सपकाळ (२६ ) व यश पुरुषोत्तम सपकाळ (८) या मायलेकांचा मोटारसायकल व ट्रक अपघातात मृत्यू झाल्याची घटना ९ फेब्रुवारी रोजी सकाळी ९.३0 वाजताच्या सुमारास गावाजवळ घडली. देवधाबा, ता. मलकापूर येथील पुरुषोत्तम सीताराम सपकाळ हे पत्नी ज्योती, मुलगा यश व मुलगी संध्या असे चार जण ज्योती सपकाळ यांच्या आतेबहिणीच्या येथे वास्तुशांती कार्यक्रमासाठी दाबिया (मध्यप्रदेश) येथे ९ फेब्रुवारी रोजी सकाळी मोटारसायकल क्रमांक एम.एच.१९ एएच ५४३ ने देवधाबा येथून जात होते. दरम्यान, त्यांच्या मोटारसायकलला मुक्ताईनगर ते रावेरदरम्यानच्या बोरर्डी गावाजवळ समोरून येणार्‍या ट्रक क्रमांक डब्ल्यूबीसी ५७७५ च्या चालकाने धडक दिली. या अपघातात मोटारसायकलवरील ज्योती सपकाळ व मुलगा यश हे ट्रकच्या मागील चाकाखाली चेंगरल्या गेल्याने त्यांचा जागीच मृत्यू झाला. तर पुरुषोत्तम सपकाळ व मुलगी संध्या हे विरुद्ध बाजूने फेकले गेल्याने जखमी झाले. याप्रकरणी रावेर पोलिसांनी ट्रकचालकाविरुद्ध गुन्हा दाखल केला असून, ट्रक जप्त केला आहे. एकाच अपघातात माय-लेकांचा मृत्यू झाल्याचे देवधाबा येथे शोकाकुल वातावरण होते. दु:खद वातावरणात या मायलेकांना चिताग्नी देण्यात आली. यश हा मलकापूर येथील स्कूल ऑफ स्कॉलरचा हुशार विद्यार्थी होता. त्याचे शाळेमधील शिक्षक, मुख्याध्यापिका व कर्मचार्‍यांनी अंत्यसंस्काराच्या वेळी उपस्थित राहून श्रद्धांजली व्यक्त केली.