‘एमआयएम’चे पालिकेसमोर ‘डफडे बजाओ’ आंदोलन

नगरपालिकेसमोर डफडे बजाओ आंदोलन करण्यात आले.

खामगाव, दि. १९- वारंवार तक्रारी करूनसुद्धा वार्ड क्र.११ मधील फाटकपुरा भागात साफसफाई होत नसल्याने, सर्वत्र घाणीचे साम्राज्य पसरले आहे. या समस्येकडे पालिकेचे लक्ष वेधण्यासाठी १७ मार्च रोजी एमआयएमचे शहर अध्यक्ष आरीफ पहेलवान यांच्या नेतृत्वात नगरपालिकेसमोर डफडे बजाओ आंदोलन करण्यात आले. वार्ड क्र . ११ मधील फाटकपुरा भागात सर्वत्र घाणीचे साम्राज्य पसरलेले असते. या भागात नगरपालिकेचे सफाई कामगार येत नसल्यामुळे स्वच्छता होत नाही. त्यामुळे या भागातील नागरिकांचे आरोग्य धोक्यात आले आहे. या संदर्भात नगरपालिकेकडे वारंवार तक्रारी करूनसुद्धा पालिका प्रशासन याकडे दुर्लक्ष करीत आहे. दरम्यान, पालिकेचे या समस्येकडे लक्ष वेधण्यासाठी एमआयएमचे शहर अध्यक्ष आरीफ पहेलवान यांनी १७ मार्च रोजी नगरपालिकेसमोर डफडे बजाओ आंदोलन केले. या आंदोलनात महासचिव अ. रहेमान शे. नजीर, अजीज कुरेशी, सै.औसीन, रज्जाक कुरेशी, हमजद भाई, शे. नासीर, मो. ईमरान आदींसह कार्यकर्ते उपस्थित होते. येत्या २५ मार्चपर्यंत फाटकपुरा भागातील समस्या दूर न झाल्यास दररोज नगरपालिकेसमोर वेगवेगळ्या प्रकारे आंदोलन करण्यात येईल, असा इशारा आरीफ पहेलवान यांनी निवेदनाद्वारे नगरपालिकेला दिला आहे.