बुलडाणा : येथील केशवनगरातील प्रसिद्ध ठेकेदार मोहम्मद अफजल मो. नजीर यांचा औरंगाबाद येथे स्वाइन फ्लू या संसर्गजन्य आजाराने एमआयटी हॉस्पिटल औरंगाबाद येथे उपचारादरम्यान ३० एप्रिल रोजी मृत्यू झाल्याची घटना घडली. त्यांच्यावर सायंकाळी उशिरा दफनविधी करण्यात आला. बुलडाणा शहरातील केशवनगर परिसरात हनुमान मंदिराजवळील रहिवासी असलेले ठेकेदार मोहम्मद अफजल मो. नजीर (वय ६९) यांना टायफाईट झाल्यामुळे बुलडाणा येथील एका खासगी हॉस्पिटलमध्ये १९ एप्रिल रोजी भरती करण्यात आले होते. मात्र, तीन दिवस उपचार केल्यानंतरही प्रकृती खालावत असल्यामुळे तसेच स्वाइन फ्लू या आजाराचे संशयित म्हणून खासगी हॉस्पिटलच्या डॉक्टरांनी त्यांना व्हेंटीलेटर सुविधेसाठी दुसऱ्या हॉस्पिटलमध्ये हलविण्याचे ठरविले. मात्र, बुलडाणा जिल्हा सामान्य रुग्णालयात व्हेंटीलेटरची सुविधा नसल्यामुळे शेवटी मोहम्मद अफजल यांना औरंगाबाद येथील एमआयटी हॉस्पिटलमध्ये उपचारासाठी भरती करण्यात आले. याठिकाणी २२ एप्रिल रोजी भरती केल्यानंतर त्यांच्या विविध चाचण्या घेऊन उपचार सुरू करण्यात आले. दरम्यान, २४ एप्रिल रोजी मोहम्मद अफजल यांना स्वाइन फ्लू पॉझिटिव्ह असल्याचा रिपोर्ट आला. त्यानुसार त्यांच्यावर उपचार सुरू करण्यात आले. मात्र, ३० एप्रिल रोजी खोकला व कपमधून रक्त पडल्यानंतर आॅक्सिजनची कमी पडू लागली. दरम्यान, त्यांचा सकाळी ११.३० वाजता मृत्यू झाला. त्यांच्यावर संध्याकाळी उशिरा बुलडाणा येथे दफनविधी करण्यात आला. त्यांच्या पश्चात दोन मुले, दोन मुली, असा आप्त परिवार आहे. बुलडाणा जिल्हा सामान्य रुग्णालयात अनेक गरीब रूग्ण उपचारासाठी येतात. मात्र, त्यांना आवश्यक त्या सुविधा मिळत नाहीत. लाखो रुपये खर्च होणाऱ्या जिल्हा सामान्य रुग्णालयात व्हेंटीलेटरची सुविधा नसल्यामुळे वडिलांना स्वाइन फ्लू संसर्गजन्य आजार झाल्यानंतर त्वरित उपचार मिळू शकला नाही, अशी खंत मृतक मोहम्मद अफजल यांचा मुलगा मुन्ना मो. अफजल यांनी व्यक्त केली.
ठेकेदाराचा स्वाइन फ्लूने मृत्यू
By admin | Updated: May 1, 2017 23:53 IST