मारहाणप्रकरणी परस्पराविरोधी तक्रार

पहिल्या तक्रारीत फिर्यादी महेंद्र रामेश्वर कड (२८) यांनी दिलेल्या तक्रारीत म्हटले आहे की, ते २१ सप्टेंबर रोजी सकाळी ११ वाजता धाड नाका येथील एका मेडिकलमध्ये गेले असता, संजय तोटे, नागेश मुळे, शुभम चौरेसह इतर आठ ते दहा लोक आले व फिर्यादीला म्हणाले की, आम्हाला राष्ट्रवादी काँग्रेसमध्ये प्रवेश करायचा आहे, असे म्हणून त्यांनी मारहाण केली, तर संजय तोटे व नागेश मुळे यांनी महेंद्र कड यांना रॉडने मारहाण केली. तेव्हा अजय सुरेश गायकवाड, उमेश ज्ञानदेव दांडगे हे तेथे आले व त्यांनी भांडण सोडविण्याचा प्रयत्न केला असता, त्यांनाही मारहाण केली. मारहाण करणाऱ्यांनी हातातील सोन्याची अंगठी, घड्याळ, सोन्याचे गळ्यातील साखळी असे दागिने घेऊन गेले असल्याचे तक्रारीत नमूद आहे. या प्रकरणी पोलिसांनी संजय तोटे, नागेश मुळे आणि शुभम चौरे या तिघांविरुद्ध गुन्हा दाखल केला आहे, तर दुसऱ्या तक्रारीत फिर्यादी संजय रामेश्वर तोटे यांनी म्हटले आहे की, धाड नाका येथे त्यांची चहाची दुकान आहे. २१ सप्टेंबर रोजी फिर्यादी व त्यांची पत्नी ज्योती संजय तोटे हे चहाचे दुकानावर असताना मनोज ज्ञानदेव दांडगे, उमेश ज्ञानदेव दांडगे, संतोष ज्ञानदेव दांडगे, महेंद्र कड, अजय गायकवाड, संतोष वसंतराव डवले, अनिल दत्तात्रय बावस्कर हे त्याची चारचाकी वाहन (क्र. एम.एच.२८ एएन ४२००) घेऊन दुकानासमोर आले. आपसामध्ये एकमेकांना अश्लील शिवीगाळ करीत होते. त्यांना याबाबत रोखले असता, ते एकदम चिडून गेले व फिर्यादीला अश्लील शिवीगाळ करून लोटपाट केली, तर गाडीमधून चाकू, गुप्ती, तलवार असे धारदार शस्त्र प्रत्येकांनी हातात घेतले. लाथाबुक्क्यांनी मारहाण करण्यास सुरुवात केली. यामध्ये फिर्यादी गंभीर जखमी झाले, तर याच वेळी गल्ल्यातील पाच ते दहा हजार रुपये आणि १ लाख ८५ हजार रुपयांचे सोन्याचे दागिने आरोपीने नेल्याची तक्रारही देण्यात आली आहे. अशा तक्रारीवरून पोलिसांनी मनोज ज्ञानदेव दांडगे, उमेश ज्ञानदेव दांडगे, संतोष ज्ञानदेव दांडगे, महेंद्र कड, अजय गायकवाड, संतोष वसंतराव डवले, अनिल दत्तात्रय बावस्कर या सात जणांविरुद्ध विविध कलमांन्वये गुन्हा दाखल केला असून, पुढील तपास सुरू आहे.