सिंदखेडराजा : शहरात लसीकरण मोहीम राबवून शहर कोविडमुक्त करण्याचा निर्णय झाला आहे. यासाठी पालिकेने तयारी पूर्ण केली आहे.
शहराची लोकसंख्या २० हजार आहे. यातील ४५ वर्षे वयोगटापासून लसीकरण करण्याची मुभा केंद्र सरकारने नुकतीच दिली आहे. त्यानुसार शहरातील वरील वयोगटातील व्यक्तींना लस देण्यासाठी पालिकेने नियोजन केले असून बुधवारी यासंदर्भात पालिका सभागृहात बैठक पार पडली..
विभागीय अधिकारी सुभाष दळवी, तहसीलदार सुनील सावंत, नगराध्यक्ष सतीश तायडे, वैद्यकीय अधीक्षक डॉ. सुनीता बिराजदार, मुख्याधिकरी प्रशांत व्हतकर, सर्व नगरसेवक, पालिका कर्मचारी व प्रत्यक्ष लसीकरण जनजागृती मोहिमेत सहभाग घेणारे पालिकेचे शिक्षक यावेळी उपस्थित होते. दर दिवशी २०० लाभार्थी नागरिकांना लस देण्याचे उद्दिष्ट समोर ठेवण्यात आले आहे. एका महिन्यात लसीकरण पूर्ण करण्यासाठी प्रयत्न केले जाणार आहेत. उपस्थित अधिकारी, नगराध्यक्ष यांनी या संपूर्ण मोहिमेचा आढावा घेतला. सर्व्हे करणाऱ्या शिक्षकांना उपयुक्त सूचना केल्या. उपस्थित अधिकारी, कर्मचारी यांच्याकडूनही आजच्या बैठकीत सूचना मागविण्यात आल्या आहेत. या लसीकरण मोहिमेत कोणतीच अडचण येणार नाही यासाठी सर्वतोपरी प्रयत्न केले जाणार आहेत.
नागरिकांनीही या मोहिमेला प्रतिसाद देऊन उपरोक्त वयोगटातील नागरिकांनी लस घेण्याचे आवाहन यावेळी करण्यात आले.