बुलडाणा: लोकसभा निवडणुकीच्या इतिहासाचा मागोवा घेतला तर आतापर्यंत कुणालाही इतके मते मिळाली नाही जितकी या निवडणुकीत प्रतापराव जाधव यांनी खिशात टाकली. मतांचे हे भरघोस पीक येण्यासाठी ह्यमोदीह्ण नावाचे खत कारणीभूत ठरले, यात कुणालाही शंका नाही. जातीपातीचे समीकरण मांडून विजयाची गणिते मांडणार्या राजकीय प्रवृत्तींनाही आजचा निकाल म्हणजे मोठी चपराक आहे. लोकांची मते बदलतात, ते बोलत नाहीत तर ह्यइव्हीएमह्णमधून प्रगट होतात, हेच या निकालाने दाखवून दिले आहे. लोकसभा निवडणूक निकालाच्या याच पृष्ठभूमीवर विधानसभा निवडणुकांची गणिते मांडली तर सध्याच्या प्रत्येक मतदारसंघातील आमदारांची ताकद व क्षमता उघडी पडली आहे. काँग्रेस-राष्ट्रवादीचे गड समजल्या जाणार्या तीनही मतदारसंघात शिवसेनेचा भगवा ज्या डौलाने फडकत आहे ते पाहता हा आगामी काळात आघाडीच्या आमदारांना इशारा आहे. या विजयामुळे युतीच्या आमदारांनाही हुरळून जाण्याची गरज नाही, कारण गेल्या निवडणुकीची तुलना केली तर आता मिळालेला लिड हा केवळ मोदी फॅक्टरचा असल्यामुळे तो टिकवून ठेवण्याची मोठी कसरत त्यांना करावी लागणार आहे.
**काँग्रेसच्या तंबुत घबराट
आ.दिलीपकुमार सानंदा यांच्या प्रभावाखालील खामगावात गेल्यावेळी शिवसेनेने लिड घेतला होता, यावेळी तर आघाडी धर्माच्या मुद्यावर रान उठवून आ.सानंदा यांनी मेरी मर्जी चलेगी, हे दाखवून दिले तरीही शिवसेनेने २६ हजारावर लिड घेतला. मूळचा भाजपाचा बालेकिल्ला असलेल्या खामगावात यावेळी लोकांनी मते बदलवली आहेत ती तशीच कायम राहिली तर नव्या परिवर्तनाचे आकाश मोकळे होईल. असाच प्रकार चिखलीत आ.राहुल बोंद्रे यांच्या प्रती आहे. काँग्रेसमध्येच गटबाजी असून आ.बोंद्रे यांच्या एकतंत्री कारभाराचे पडसाद मतदारसंघात उमटतात, त्यामुळे राष्ट्रीय स्वयंसेवक संघाची राजधानी असलेल्या चिखलीत तरी हे पडसाद धोक्याच्या घंटेत रूपांतरीत होतील.
**आ.डॉ.शिंगणे यांना डबल धक्का
राष्ट्रवादीचे जिल्ह्यातील एकमेव दमदार नेतृत्व असलेले आ.डॉ.राजेंद्र शिंगणे यांना सतत धक्के बसत आहेत.निकालाच्या पुर्वसंध्येलाच त्यांच्या नावाने ओळखल्या जाणारी जिल्हा बँक अवसायनात निघाली व दुसर्या दिवशी सिंदखेडराजा मतदारसंघात सर्वाधिक म्हणजे ३१ हजाराचा लिड सेनेला मिळाला. आ.शिंगणे यांचे पक्षासोबत ताणलेले संबंध सुरळीत झाले नाहीत. बँकेला शेवटपर्यंत मदत मिळाली नाही तर ज्या स्वाभिमानाने त्यांनी राजीनामा भिरकावत लोकसभेची उमेदवारी नाकारली तोच प्रकार विधानसभेत होण्याची शक्यता नाकारता येत नाही, याचे उत्तर काळच देईल; मात्र सध्या तरी सिंदखेडची नगरपालिकाही गेली, सेनेची ताकद वाढली याचाच धक्का मोठा आहे व तो वाढू शकतो. या मतदारसंघात मिळालेला लिड हा मोदीच्या नावाने खपला गेला आहे.