गौण खनिजाची वाहतूक करणारा ट्रॅक्टर पकडला

स्थानिक पोलीस स्टेशनचे पी.एस.आय. शिवाजी राठोड व पोलीस काॅन्स्टेबल हर्षल सहगल यांना डोणगांव ते लोणी गवळी रोडवर २७ जूनला गौण खनिजाची अवैध वाहतूक सुरू असल्याची गुप्त माहिती मिळाली होती. लोणी गवळीकडून एक लाल रंगाचे बिनानंबरचे ट्रॅक्टर व त्यास जोडलेली ट्राॅली (क्र. एम.एच.२८ ए.एस.१५०१) येताना दिसली. दरम्यान, त्या ट्रॅक्टरला थांबवून तपासणी केली असता ट्रॉलीमध्ये एक ब्रास (डब्बर)गौण खनिज दिसून आली. गौण खनिजाची वाहतूक करण्याचा परवाना व रॉयल्टीबाबत विचारले असता चालकाने कोणत्याही प्रकारचा परवाना नाही, असे सांगितले. ट्रॅक्टर व ट्रॉली किंमत सहा लाख रुपये व त्यामध्ये भरलेली गौण खनिज ४ हजार रुपये असा एकूण ६ लाख ४ हजारांचा माल जप्त करण्यात आला आहे. याप्रकरणी चालक हमिद जुम्मा गवळी याच्याविरुद्ध विविध कलमांन्वये गुन्हा दाखल करण्यात आला आहे. ट्रॅक्टर व ट्रॉली पोलीस स्टेशनला आणून लावण्यात आले आहे. पुढील तपास ए. एस. आय. अशोक नरोटे करत आहेत.