कारची वाहनाला धडक; सात जखमी

बुलडाणा-मलकापूर मार्गावर झालेल्या अपघातात सात जण जखमी झाल्याची घटना.

मोताळा : तालुक्यातील मूर्तीवरून लग्न सोहळा आटोपून कुटुंबियांसह नांदुर्‍याकडे येणार्‍या आर्टिका गाडीला भरधाव वेगाने जाणार्‍या मारूती कारने समोरून धडक दिली. या अपघातात आर्टिकामधील सात जण जखमी झाल्याची घटना बुलडाणा-मलकापूर मार्गावर मोताळय़ापासून तीन किमी अंतरावरील परडा फाट्याजवळ १६ मे रोजी सायंकाळी घडली. एम.एच.२८ व्ही ५५३१ या क्रमांकाच्या आर्टिका गाडीने मूर्ती येथून लग्न समारंभ आटोपून शिवाजीराव नारायण खाकरे वय ५९, शैलजा शिवाजीराव खाकरे वय ५५, शैलेश शिवाजीराव खाकरे वय ३५, सपना शैलेश खाकरे वय ३0, यथार्थ शैलेश खाकरे वय ४, सई शैलेश खाकरे वय २, चेतना सदाशीव दाने वय ३६ हे नांदुर्‍याकडे येत असताना मोताळा मार्गावरील डॉ. चोपडे यांच्या शेताजवळ पुण्याकडे जात असलेल्या मारूती अ‍े स्टार क्रमांक एम.एच.१४ सीएस ७६२१ च्या चालकाने समोरून जबर धडक दिली. धडक एवढी जबरदस्त होती की, खाकरे कुटुंबियांच्या आर्टिका गाडीने दोन पलट्या मारल्यामुळे गाडीचे समोरील व मागील दोन चाके फुटून गाडीचे मोठे नुकसान झाले व गाडीमधील बसलेले सातही जण गंभीर जखमी झाले. जखमींपैकी शैलेश खाकरे यांची प्रकृती गंभीर असल्यामुळे त्यांना अकोला येथे रेफर केले असल्याची माहिती आहे. याप्रकरणी बोराखेडी पोलिसांनी चालकाच्या विरोधात कलम २७९, ३३७, ४२७ भादंविनुसार गुन्हा दाखल केला आहे.