मृतकाच्या नावावर केली प्लॉटची खरेदी

बुलडाणा जिल्ह्यातील देऊळघाट येथील प्रकार; आठ लोकांवर गुन्हा दाखल.

बुलडाणा : चौदा वर्षांंपूर्वी मरण पावलेल्या व्यक्तीला कागदोपत्री जिवंत दाखवून आठ जणांनी त्याच्या प्लॉटची बनावट खरेदी केल्याचा खळबळजनक प्रकार देऊळघाट येथे उघडकीस आला आहे. या बनावट खरेदीची तक्रार झाल्यानंतर शहर पोलिसांनी २८ जून रोजी तमकिन अहमद अ. रऊफ, इरफान बेग युनूस बेग, साकीब अहेमद सालीक अहेमद, अनिस अहमद अब्दुल रऊफ, गुलाम रसूल टेलर, सालिक अहमद अ.रऊफ, सोहिल अहमद अ. रऊफ याच्यासह एका अनोळखी व्यक्तीविरुद्ध फसवणुकीचे गुन्हे दाखल करण्यात आले. आरोपीपैकी इरफान बेग यास अटक करण्यात आली आहे. देऊळघाट येथील सेवानवृत्त शिक्षक जियाउद्दीन अ. करीम यांनी तक्रारीत नमूद केले की, देऊळघाट येथील गट नंबर मधील प्लॉट क्रमांक हा जईम अहमद याने १९ डिसेंबर १९८९ रोजी विकत घेतला होता; परंतु तो जूून १९९0 रोजी आजाराने मरण पावला. त्याच्या अकाली निधनामुळे प्लॉटची फेरफार घेण्याचे राहून गेले. आठ दिवसांपूर्वी उपरोक्त प्लॉटवर जागेचे बांधकाम मोजमाप करण्यासाठी गेलो असता, पुतण्या तमकीन अहमद अ. रऊफ याने तेथे येऊन हा प्लॉट हा माझ्या मालकीचा असून त्यावर बांधकाम करू शकत नाही, असे सांगितले. एवढेच नव्हे तर त्याने २८ एप्रिल २0१४ रोजी केलेले खरेदी खत दाखविले. ते खरेदी खत पाहून धक्काच बसला. वास्तविक ज्याच्या नावे प्लॉट होता, त्याचा मृत्यू १९९0 मध्ये झालेला आहे. बुलडाणा पोलिसात मो. जियाउद्दीन यांनी दिलेल्या तक्रारीच्या आधारे आरोपी तमकीन अहेमद अ.रऊफ, इरफान बेग युनुस बेग, साकीब अहेमद सालिक अहेमद, सालिक अहेमद अ. रऊफ, सोहिल अहेमद अ. रऊफ सर्व रा. बुलडाणा तसेच अनीस अहेमद अ. रऊफ, गुलाम रसुल ऊर्फ अशू टेलर रा. देऊळघाट यांच्यावर भ भादंवि ४२0, ४६७, ४७१,३४, १२0(ब) नुसार गुन्हा दाखल करण्यात आला आहे. यापैकी एकाला अटक करण्यात आली असून इतर आरोपींना न्यायालयाकडून अटकपूर्व जामीन मिळाल्याचे कळाले.