रस्त्यासाठी भजन आंदोलन

रस्त्याचे काम तातडीने पूर्ण व्हावे, या मागणीसाठी आज १३ मे रोजी हरसोडा येथील ग्रामस्थांनी दोन तास भजन आंदोलन केले.

मलकापूर : धुपेश्‍वर रस्ता तसेच वडोदा रस्ता मंजूर होवून सुध्दा सदर रस्त्याचे काम ठेकेदाराने पूर्ण केले नाही. त्यामुळे या रस्त्याचे काम तातडीने पूर्ण व्हावे, या मागणीसाठी आज १३ मे रोजी अँड.हरिश रावळ यांचे नेतृत्वात हरसोडा येथील तेजराव रायपुरेसह ग्रामस्थांनी टाळ, मुदूंग, पेटी, विणा व झांज वाजवून सां.बा.विभागात दोन तास भजन आंदोलन केले. धुपेश्‍वर रस्ता हा मंजुर होवून ६ महिने उलटल्यावर सुध्दा ठेकेदार मजुरांना पैसे देत नाही म्हणून मजुर काम सोडून गेले. त्यामुळे रस्त्याचे काम प्रलंबित पडले. तसेच वडोदा येथील रस्ता सुध्दा प्रलंबित आहे. गावकर्‍यांचे या रस्त्यावर प्रचंड हाल होत आहे. सदरची कामे करावी याकरिता बरेचवेळा आंदोलन करुन सुध्दा ठेकेदार थोडेशे काम सोडून रस्ता अर्धवट सोडतो, अधिकारी गंभीरतेने या रस्त्याकडे लक्ष देत नाही. या अधिकार्‍यांना व ठेकेदारांना प्रसन्न करण्यासाठी शांततेचे मार्गाने धुपेश्‍वर संस्थान येथील तेजराव राजपुरे, सरपंच अंबादास रायपुरे, साहेबराव रायपुरे, राहुल जाधव यांचे नेतृत्वात दोन तास गावकर्‍यांनी सार्वजनिक बांधकाम विभागात जोरजोरात भजने म्हटली. यावेळी रस्त्यावरील लोक आश्‍चर्यचकीत होवून या आंदोलनाला प्रोत्साहन देत होते. शेवटी अभियंता नवलकर, अभियंता जाधव यांनी सदर काम दोन दिवसात सुरु करतो असे आश्‍वासन दिल्यानंतर या आंदोलनाची सांगता झाली. या आंदोलनात अँड. हरिष रावळ यांच्यासह राहुल जाधव, तेजराव रायपुरे, सरपंच अंबादास रायपुरे, पांडूरंग ताठे, साहेबराव रायपुरे, प्रकाश घुटे, अमृतराव देशमुख, भास्कर रायपुरे, नवृत्ती कहाते, श्रीकृष्ण रायपुरे, पुरुषोत्तम रायपुरे, भास्कर धांडे, लक्ष्मण कोलते, अशोक रायपुरे, सुरेश कोकाटे, रमेश झाल्टे, पंकज खापरे, निल रायपुरे, देविदास भोंडेकर, संजय चंदेलकर, प्रल्हाद झाल्टे, निना कांडेलकर, पर्वतराव झाल्टे, कलीम पटेल यांचेसह ग्रामीण भागातील असंख्य नागरिकांनी सहभाग घेतला. जर दोन दिवसात काम सुरु केले नाही तर परिसरातील नागरिकांना घेवून धरणगांव येथे राष्ट्रीय महामार्गावर रास्तारोको आंदोलनाचा इशारा हरिश रावळ, तेजराव रायपुरे यांनी दिला आहे.