बजरंग दल, विहिंपचा आंदोलनाचा इशारा

मेहकर शहरासह ग्रामीण भागात उघड्यावर मांस विक्री.

मेहकर (जि. बुलडाणा) : मेहकर शहरासह ग्रामीण भागात उघड्यावर मांस विक्री जोमात सुरू आहे. यामुळे भाविकांच्या भावना दुखावल्या जात असून, पोलीस विभागाचे या समस्येकडे दुर्लक्ष होत आहे. त्यामुळे उघड्यावरील मांस विक्री तत्काळ बंद करावी अन्यथा आंदोलन करण्यात येईल, असा इशारा बजरंग दल व विश्‍व हिंदू परिषदेच्यावतीने २२ जुलै रोजी उपविभागीय अधिकार्‍यांकडे निवेदनाद्वारे देण्यात आला आहे. मेहकर शहरामध्ये आठवडी बाजार, लोणार फाटा, डोणगाव रोड, शिक्षक कॉलनी, तसेच ग्रामीण भागात बहु तांश खेड्यात, रस्त्यावर, फाट्यावर उघड्यावर मांस विक्री जोमात सुरू आहे. या प्रकारामुळे भाविकांना त्रास हो त आहे. तर याचा परिणाम नागरिकांच्या आरोग्यावर होत असून, नागरिकांचे आरोग्यही धोक्यात आले आहे. पुढील महिन्यात हिंदू भाविकांचा श्रावण महिना सुरू होत आहे. या महिन्यात प्रत्येक गावात विविध धार्मिक कार्यक्रम राबविल्या जातात. श्रावण महिन्यात सर्वत्र भक्तिमय वातावरण निर्माण झालेले असते. ठिकठिकाणी यात्रा भरतात. अनेक भक्तगण दर्शनासाठी विविध धार्मिक स्थळांवर येणे-जाणे करीत असतात; मात्र तालुक्यात होत असलेल्या उघड्यावर मांस विक्रीमुळे भाविकांना याचा त्रास होतो. त्यामुळे उघड्यावर होणारी मांस विक्री तत्काळ बंद करावी, अन्यथा बजरंग दल व विश्‍व हिंदू परिषदेच्यावतीने आंदोलन करण्यात येईल, असा इशारा नीलेश नाहटा, नीलेश गाभणे, पवन गाभणे, जगदेव गवई, अँड. गजानन ठाकरे, मुन्ना ठाकूर आदींनी दिला आहे.