अंगावर वाहन घालून जिवे मारण्याचा प्रयत्न

राजकीय द्वेषभावनेतून चारचाकी वाहनाने उडविण्याचा प्रयत्न; बुलडाणा-देऊळघाट मार्गावरील घटना.

बुलडाणा : राजकीय द्वेषभावनेतून देऊळघाटचे सरपंच अ. रज्जाक ऊर्फ बबलू यांचा मुलगा अ. सादिक याने युवक काँग्रेसचे सचिव गजनफर खान यांना आपल्या चारचाकी वाहनाने उडविण्याचा प्रयत्न केला. बुलडाणा-देऊळघाट रोडवर १८ मार्च रोजी दुपारी ही घटना घडली. यात गजनफर खान व त्यांचे वडील जखमी झाले. त्यांच्यावर जिल्हा सामान्य रुग्णालयात उपचार सुरू आहेत. गजनफर खान हे त्यांचे वडील जफरउल्ला खान यांना दुचाकीने दुपारी ३.३0 वाजता बुलडाण्याहून देऊळघाटला घेऊन जात असताना देऊळघाट येथील सरपंचाचा पुत्र अ. सादिक हा पाठीमागून बोलेरो कार (क्र. एम.एच.२८- सी ५३७८) घेऊन आला आणि दुचाकीला मागून जोरदार धडक देऊन निघून गेला. त्यामुळे संतुलन बिघडून दुचाकीसह ते रस्त्यावर पडले. यात गजनफर खान व त्यांचे वडील दोघेही जखमी झाले. त्यांच्यावर जिल्हा सामान्य रुग्णालयात उपचार सुरू आहेत. गजनफर खान यांच्या तक्रारीवरून शहर पोलीस ठाण्यात गुन्हा दाखल करण्याची प्रक्रिया सुरू होती. देऊळघाटचे सरपंच अ. रज्जाक ऊर्फ बबलू यांच्याविरुद्ध बेकायदेशीर गौणखनिज उत्खननाच्या अनेक तक्रारी भ्रष्टाचाराचे अनेक आरोप आहेत. एका प्रकरणात त्यांना दोन लाख रुपयांचा दंड ठोठावण्यात आला आहे. यामुळे चिडून हे कृत्य त्यांच्या मुलाने केल्याची चर्चा झडत आहे