बुलडाणा : राज्य शासनाच्या निर्देशानुसार ४ जुलै रोजी होऊ घातलेल्या शाळाबाह्य मुलांच्या सर्वेक्षणासाठी जिल्ह्यात ५ हजार ७१७ कर्मचारी तैनात करण्यात आले असून, सकाळी ७ वाजेपासून सर्वेक्षणाला सुरुवात होत आहे. यापूर्वी २00६ मध्ये शाळाबाह्य मुलांचे सर्वेक्षण करण्यात आले होते. त्यानंतर तब्बल नऊ वर्षानंतर हे सर्वेक्षण होत आहे. मागील वेळी केवळ ५४२ शाळाबाह्य मुलांची नोंद करण्यात आली होती. यावर्षीच्या सर्वेक्षणात यामध्ये मोठी वाढ होणार आहे. त्यासाठी जिल्हा प्रशासनाच्यावतीने खबरदारी घेण्यात येत आहे. बुलडाणा जिल्ह्यातील प्रत्येक गावासह शहरातील प्रत्येक घरी, प्रत्येक वस्तीत, तांड्यात जाऊन हे सर्वेक्षण होत आहे. यात शाळाबाह्य आढळलेल्या मुलाच्या हाताला शाई लावून त्याला शाळेत प्रवेशित करण्यात येणार आहे. एकही विद्यार्थी शाळाबाह्य राहणार नाही याची दक्षता घेण्यात येत आहे. या शाळाबाह्य मुलांच्या सर्वेक्षणासाठी जिल्हाधिकारी यांच्या अध्यक्षतेत समिती तयार करण्यात आली आहे. या समितीत शिक्षण व महसूल विभागाच्या अधिकार्‍यांचा समावेश आहे. याच पद्धतीने तालुकास्तरावर समित्या नियुक्त करण्यात आल्या आहेत. या समित्यामध्ये सचिव म्हणून तालुक्याचे गटशिक्षणाधिकारी काम सांभाळणार आहेत. सकाळी ७ सायंकाळी ७ वाजेपर्यंंत घरोघरी, बसस्थानक, रेल्वेस्थानक, सार्वजनिक ठिकाणी,आठवडी बाजार, वीटभट्टय़ा, बांधकामे, झोपडपट्टी, वस्तू विकणारी तसेच भीक मागणारी मुले आदी ठिकाणी शाळाबाहय़ मुलांचे सर्वेक्षण करण्याचे आदेश आहे.
*यापूर्वी केवळ ५४२ विद्यार्थ्यांंचा समावेश
यापूर्वी जिल्ह्यात सन २00६ मध्ये शाळाबाह्य मुलांचे सर्वेक्षण झाले होते. हे सर्वेक्षणसुद्धा एकाच दिवशी एकाच वेळी करण्यात आले होते. या सर्वेक्षणात ५४२ शाळाबाह्य मुले आढळून आल्याची माहिती जिल्हा परिषदेच्या सर्व शिक्षा अभियान विभागाच्यावतीने देण्यात आली. यावर्षी यामध्ये वाढ होण्याची शक्यता आहे.
*जिल्ह्यात २२ अधिकृत मदरसे
यावर्षीच्या शाळाबाह्य मुलांच्या सर्वेक्षणामध्ये शासनाने आमूलाग्र बदल केले आहेत. त्यामुळे या सर्वेक्षणामध्ये शाळाबाह्य मुलांचे आकडे वाढणार आहे. जो विद्यार्थी सतत दोन महिने शाळेत गैरहजर राहिला त्यालाही शाळाबाह्य मुलांमध्ये गणल्या जाणार आहे. तर मदरशामध्ये शिक्षण घेणार्‍या विद्यार्थ्यांंचाही शाळाबाह्य मुलांमध्ये समावेश करण्यात येत आहे. बुलडाणा जिल्ह्यात अधिकृत २२ मदरसे आहेत. त्यांची नोंद वक्फ बोर्डाकडे आहे. या मदरशामध्ये २ ते ३ हजार विद्यार्थी असतील असा अंदाज काढण्यात आला आहे. याशिवाय अधिकृत नोंद नसलेले मरदसेसुद्धा जिल्ह्यात आहेत; मात्र त्याबद्दल प्रशासनाकडे माहिती नाही.