ट्रक-काळीपिवळीचा अपघातात ३ ठार

नादुरा मार्गावर रविवारी मध्यरात्री घडला अपघात.

खामगाव (जि.बुलडाणा) : भरधाव ट्रकने समोरुन येणार्‍या काळीपिवळीला जोरदार धडक दिल्याने झालेल्या भीषण अपघातात तीन युवक जागीच ठार झाले. ही दुर्घटना रविवारी मध्यरात्रीनंतर १.३0 वाजेच्या सुमारास नांदुरा रोडवरील अंबोडा फाट्याजवळ घडली. दीपक सुभाष बोचरे (२४), अमोल बळीराम कवठाळे (२0) व निलेश भागवत गायकी अशी मृतांची नावे आहेत. सुटाळा खुर्द येथील हे तीन युवक काळी-पिवळीने कामानिमित्त रविवारी रात्री नांदुरा येथे गेले होते. काम आटोपून रात्री उशिरा तिघेही नांदुर्‍याकडे येत होते. सुजातपूर कारखान्याजवळ अंबोडा फाट्याजवळ भरधाव ट्रकने काळीपिवळीला जोरदार धडक दिली. यात काळीपिवळीचा चुराडा होऊन तिघांचाही जागीच मृत्यू झाला. अपघातानंतर ट्रकचालक घटनास्थळावरुन पसार झाला. या प्रकरणी किसन नारायण आखरे दिलेल्या तक्रारीवरुन जलंब पोलीस ठाण्यात ट्रक चालकाविरुध्द गुन्हा दाखल करण्यात आला आहे.